Россиянинг Санкт-Петербург шаҳрида яшовчи Алла исмли аёл Хитойдан қайтганидан сўнг 14 кунлик коронавирус карантинга жойлаштирилган касалхонадан қочиб кетди. Бу ҳақда Meduza хабар берди.
Маълум қилинишича, 32 ёшли аёл 7 февраль, жума куни, касалхонадаги карантин изоляторидан қочиб кетган. Аммо бу ҳақда энди маълум бўлган. Аёлнинг сўзларига кўра, у қочиб кетганига тўрт кун бўлса ҳам, на касалхона ва на полиция унга мурожаат қилмаган.
Касалхона бош шифокори аёлнинг хатти-ҳаракатларини безорилик деб атаган. Унинг таъкидлашича, шифохонада ўрнатилган чекловларни бузганлик учун жиноий жавобгарлик ҳам кўзда тутилиши мумкин. Бош шифокорнинг қўшимча қилишича, аёлнинг қочиб кетгани ҳақидаги маълумот полицияга юборилган.
Яна бир шунга ўхшаш воқеа Самара шаҳрида юз берган. Гузел Недер исмли аёл боласи билан каратин учун жойлаштирилган касалхонадан қочиб кетганини маълум қилган. Аёл кўрсатма бериш учун полицияга чақирилган.
Маълумот учун, Хитойда коронавирус оқибатида вафот этганлар сони 1016 кишидан ошиб кетди. Маълумотларга кўра, айни вақтда мамлакат ҳудудида 42 638 кишида касаллик ҳолати қайд этилган. 37 726 киши ҳозирда даволанишда бўлиб, улардан 7333 нафарининг аҳволи оғир. Жами 3996 киши касалликдан даволаниб, тиббиёт муассасасидан уйига жавоб бериб юборилган.
Мавзуга доир: Хитой коронавируси бўйича 11 февралнинг асосий хабарлари
Ўзбекистон Соғлиқни сақлаш вазирлиги ҳузуридаги Санитария-эпидемиологик осойишталик агентлиги маълумотларига кўра, 10 февраль, душанба кунигача Хитойда бўлиб қайтган 3447 нафар фуқаро тиббий кўрикдан ўтказилган. Улардан 2676 нафарида касалликнинг яширин даври (14 кун) якунлангани ва тиббий кўрик давомида ҳеч қандай коронавирус инфекцияси белгилари аниқланмаганлиги боис тиббий кузатув ишлари якунланган. Бугунги кунда 771 нафар фуқаро 14 кунлик тиббий кузатувга олинган. Хитойдан чартер рейс билан олиб келинган ўзбекистонлик Тошкент вилоятидаги «Бўстон» санаторийсида карантин муддатини ўтамоқда.
Изоҳ (0)