Ўзбекистонда жорий йил 10 та халқаро ва 114 та маҳаллий янги автобус йўналиши очилади

Ўзбекистонда жорий йил 10 та халқаро ва 114 та маҳаллий янги автобус йўналиши очилади. Бу Президентнинг «Илм, маърифат ва рақамли иқтисодиётни ривожлантириш йили» давлат дастурига оид фармони лойиҳасида кўзда тутилган.

Ҳужжатда Тошкент метрополитенининг Сергели йўналишида қурилиш ишларини якунлаш, ерусти метро халқа йўлининг Қўйлиқ бозоридан Олмазор бекатигача бўлган қисмида қурилиш ишларини олиб борилиши қайд этилган.

Шунингдек, Испаниядан 2 та Talgo тезюрар поезди олиб келиниши, Поп—Наманган—Андижон темир йўл участкасини электрлаштириш ишларини якунига етказиш ва водий вилоятлари бўйича айланма ҳалқа темир йўли бўйлаб янги электр поездлари қатновини йўлга қўйиш режалаштирилган.

Аҳолига автотранспорт хизмати кўрсатиш тизимини яхшилаш мақсадида республика бўйича:

10 та халқаро ва 114 та маҳаллий янги автобус йўналишини очиш;

26 та автостанция қуриш ва реконструкция қилиш;

296 та оралиқ бекатларни қуриш;

600 та янги автубус сотиб олиш кўзда тутилган.