«Тартиб йўқ, марказий йўналишларда тирбандлик, тиқилинч». Қашқадарё ҳокими жамоат транспорти фаолиятини танқид қилди

Қашқадарё ҳокими Зоир Мирзаев вилоятдаги жамоат транспорти фолиятини танқид қилиб, Damas ҳайдовчилари фаолиятини қониқарсиз баҳолаган. Бу ҳақда «Дарё»га вилоят ҳокимлиги ахборот хизмати раҳбари Аҳрор Содиқов маълум қилди.

Хабар берилишича, 11 февраль, сешанба куни, Қашқадарё ҳокими раҳбарлигида вилоят аҳолисига сифатли транспорт хизматини кўрсатиш бўйича йиғилиш бўлиб ўтган. Унда Зоир Мирзаев аксарият жамоат транспорт воситалари, айниқса, Damas’лар белгиланмаган манзилларда тўхтаб, бошқа транспорт воситаларига ноқулайликлар келтириб чиқараётганини таъкидлаган. Айрим транспорт уюшмаларида йўловчи ташиш техникаларини техник кўрикдан ўтказиш, ҳайдовчиларни тиббий кўрикдан ўтказиш учун шарт-шароит яратилмаганлиги, транспорт бошқармаси мутасаддиларининг эътиборсизлигига тўхталиб ўтган.

— Қарши шаҳрида айрим автобусларда 1000 сўмлик тарифлардан ортиқча ҳақ олиш ҳолати, транспортлар нотозалиги, ҳайдовчиларнинг қўпол муомаласи ҳақида мурожаатлар кўп. Жамоат транспортларида ҳалигача йўл карточкалари жорий этилмаган, — деди Зоир Мирзаев. — Бу ҳақдаги ҳақли эътирозлардан келиб чиқиб, қатор чора-тадбирлар ишлаб чиқилиши керак.

Маълумот берилишича, вилоятда айни кунда 345 та йўналишда 4250 та жамоат транспорти фаолият юритади. Мавжуд 261 та автобус ва 3669 та Damas вилоят аҳлининг жамоат транспортига бўлган эҳтиёжини қондиролмаяпти. Эҳтиёжни қондириш учун яна 170 та автобус керак бўлади.

— Вилоятдаги йўловчи ташишга ихтисослаштирилган корхоналар томонидан жами 119 та автобус сотиб олиниши белгиланган бўлса-да, 2018—2019 йиллар давомида умуман сотиб олинмаган, — деди Зоир Мирзаев. — Тартиб йўқ, марказий йўналишларда тирбандлик, тиқилинч. Туманлардан келаётган Damas’лар йўналиши айнан марказий кўчалардан кесиб ўтади. Йўловчи ташиш транспортлари жадвалга амал қилмай, сунъий равишда ноқонуний тўхташ жойлари ташкил қилиб олган.

Йиғилишда маълум қилинишича, жамоат транспортларида тартиб йўқлиги натижасида 2019 йил вилоятда йўловчи ташувчи транспорт воситалари билан боғлиқ 37 та йўл-транспорт ҳодисаси содир бўлган.

Зоир Мирзаев йиғилиш якунида мавжуд камчиликларни бартараф этиб, йўл карточкаларини жорий этиш, шаҳар атрофи ва туманлардан қатновчи йўловчи ташиш транспортлари фаолиятини жадвал асосида ташкил этиш ҳақида топшириқ берган.