10 февраль соат 10:00 атрофида Наманган вилояти Уйчи тумани ҳудудидан оқиб ўтувчи Норин дарёси (Фарғона ҳалқаси авто йўлининг 98 километрида) кўпригида хизмат олиб бораётган Миллий гвардия Қўриқлаш хизмати ходими А.Абдулвохидов дарёда чўкаётган аёлга кўзи тушиб, уни қутқариш мақсадида зудлик билан ўзини сувга ташлаган. Аёлни кучли оқим домидан олиб чиқиб, қирғоқдаги шериги қўлига топширган йигит, унинг ҳаётини сақлаб қолган, деб ёзмоқда Миллий гвардия ахборот хизмати.
Бироқ қиш фаслидаги сув ҳарорати совуқ экани ҳамда унда кўп вақт қолиб кетганлиги оқибатида Абдулходининг томирлари тортишиб қолган ва дарёнинг кучли оқими уни олиб кетиб қолган. Аёл эса зудлик билан шифохонага етказилган.
Маълум бўлишича, қутқарилган аёл 1994 йилда Наманган туманида туғилган, Руҳий касалликлар диспансерида рўйхатда турувчи Н.О. бўлиб, жонига суиқасд қилиш мақсадида дарёга ўзини ташлаган. Ҳолат юзасидан тегишли орган ходимлари томонидан суриштирув ишлари олиб борилмоқда.
Миллий гвардия ходими А.Абдулвохидовнинг қидирув-қутқарув ишлари ҳамон олиб борилмоқда, дейилади хабарда.
Аввалроқ Қашқадарёда Миллий гвардия ходимлари Қарши шаҳридаги Ислом Каримов кўчасидан оқиб ўтувчи Қашқадарё дарёсига сакраб, ўз жонига қасд қилмоқчи бўлган икки фуқаронинг ҳаётини сақлаб қолган эди. Самарқандлик йигит эса сувда чўкаётган 3 яшар болакайни қутқарганди. Хоразмлик 21 ёшли Ёқуббой Дўсматов сувга чўкаётган аёлнинг ҳаётини сақлаб қолган. Бу жасорати учун Ёқуббой Дўсматов ФВБга ишга таклиф қилинган. Бироқ бу вақтда у Россияга ишлашга жўнаб кетган эди. Россияга боргач, йигитнинг ўзи ҳам қийин вазиятга тушиб қолган.
5 февраль куни талабалар Дарғом каналида чўкаётган қизни қутқариб қолган. кейинчалик 8 февраль куни Самарқанд Иқтисодиёт ва сервис институти талабалари бўлган Рўзимурод Мардонов ва Сарвар Муҳаммадиев ФВБ томонидан ташаккурнома топширилганди.
Изоҳ (0)