Ўзбекистон Молия вазирлиги давлат хизматчиларига хизмат автомобиллари ажратишни тартибга солишга қаратилган янги меъёрий ҳужжат устида ишламоқда. Бу ҳақда Молия вазирлиги матбуот хизматига таяниб, «Gazeta.uz» хабар берди.
Маълум қилинишича, Президентнинг 2019 йил 30 декабрдаги қарорига биноан, Транспорт вазирлиги Молия вазирлиги билан биргаликда жорий йилнинг 1 июнига қадар давлат муассасаларида енгил автомобиллар сонини белгилаш, шунингдек, синфларга қараб раҳбар ходимларга хизмат автомобилларини тайинлаш тартибини ишлаб чиқиши керак.
Молия вазирлиги томонидан таъкидланишича, ушбу йўналишда амалдаги қонунчилик «жуда эскирган». Вазирлар Маҳкамасининг 2011 йил 26 майдаги қарори билан давлат бюджетидан молиялаштириладиган вазирликлар, идоралар ва уларга бўйсунувчи ташкилотлар аппаратлари, ҳокимликлар аппаратларининг (2011 йил май ойи якунига кўра, республикада 3184 та) ва хўжалик субъектлари (7344 та) хизмат транспорт воситаларининг максимал сони белгиланган.
«Ушбу ҳужжат 2011 йилда чиқарилган. Тўққиз йил ўтди. Сўнгги уч йил ичида қандай ислоҳотлар амалга оширилаётганига эътибор берган бўлсангиз керак. Янги ташкилотлар ва идоралар пайдо бўлди, баъзи вазирликлар бирлаштирилди, баъзилари бўлинди. Энди ушбу ҳужжатни қайта кўриб чиқиш зарурати пайдо бўлди», — деб таъкидланган Молия вазирлиги томонидан.
Вазирлик хизмат автомобилларини ажратишда ва унинг синфини аниқлашда қийинчиликлар мавжудлиги сабабли харажатларни оптималлаштириш бўйича халқаро амалиётни ўрганмоқда.
«Масалан, янги агентлик очилди. Хизмат автомобилини агентлик директори ва ўринбосарига ажратиш бўйича кўрсатма берилди. Лекин улар қайси автомобиль турини танлаши керак? Агентлик юқори синфдаги автомобилни олишни хоҳлайди ва биз бюджет маблағларидан унумли фойдаланиш учун ушбу синфдаги автомобиль сизга мос келади деб айтамиз», — дея таъкидлаган вазирлик вакили.
Янги ҳужжатни ишлаб чиқишда хизмат автоулови синфларини аниқ белгилаш бўйича таклиф бериш режалаштирилган.
«Вазир учун шартли равишда ‘А’ синфдаги автоулов, унинг ўринбосари — ‘Б’ синфдаги автомашина, бошқа ходимлар — бошқа синфдаги автомобиллар», — дейилади вазирлик хабарида.
Вазирлар Маҳкамасининг қарорида шахсий, навбатчи хизмат транспорт воситалари ва махсус транспорт воситалари назарда тутилган. Молия вазирлигининг таъкидлашича, кўпинча шахсий автомашинаси сифатида Chevrolet Malibu ва чет эл автомобиллари тақдим этилади.
Қайд этилишича, хорижий маркадаги автомобилни сотиб олиш мумкинми ёки йўқми, деган савол очиқ қолмоқда. Янги ҳужжат ушбу саволга жавоб бериши ҳамда тушунмовчиликларни бартараф қилиши керак.
Нашрнинг ёизишича, ҳукуматнинг 1999 йил 2 апрелдаги қарори билан шахсий хизмат автотранспорт воситалари қуйидагиларга бириктирилади:
- вазирлар, давлат қўмиталари, идоралар ва бошқа республика жамоат ташкилотлари ва бюджетдан молиялаштириладиган органлар раҳбарлари, шунингдек, уларнинг ўринбосарлари;
- Қорақалпоғистон Республикаси Вазирлар Кенгаши раиси, вилоятлар ва Тошкент шаҳар ҳокимлари, шаҳар ва туманларнинг ҳокимлари, уларнинг биринчи ўринбосарлари ва ўринбосарлари, шунингдек, бюджетдан молиялаштириладиган ҳудудий тузилмалар раҳбарлари.
Изоҳ (0)