Xorazm viloyati Bog‘ot tumanining Qipchoq qishlog‘ida yashovchi 21 yoshli Yoqubboy Do‘smetov suvga cho‘kayotgan ayolning hayotini qutqarib qolgani haqida xabar berilgan edi.
Foto: “Xabar.uz”
“Xabar.uz”ning yozishicha, 10-yanvar kuni viloyat hokimi o‘rinbosari, viloyat xotin-qizlar qo‘mitasi raisi Gulsara Qurbanbayeva hamda Bog‘ot tumani hokimi Oybek Xolboyevlar Yoqubboy Do‘smetov o‘sib-ulg‘aygan xonadonga tashrif buyurgan.
Ma’lum bo‘lishicha, Yoqubboy ota-onasi bilan Rossiyaga ishga jo‘nab ketgan ekan.
Mutasaddilar Yoqubboyning akasiga tashakkurnoma va sovg‘alar topshirgan.
Foto: “Xabar.uz”
Aynan shu kuni Xorazm viloyat Favqulodda vaziyatlar boshqarmasi matbuot xizmati rahbari Shodlik Hasanov ham Do‘smetovlar xonadoniga kelib, boshqarma boshlig‘i tashakkurnomasi va sovg‘alarni taqdim qilgan.
Shodlik Hasanov Yoqubboyning qarindoshlari bilan suhbatda agar Yoqubboy xohlasa, rahbariyat uni FVBga ishga olishga tayyor ekanini aytgan.
“Yoqubboy Do‘smetovning jasoratiga Yoshlar ittifoqi Xorazm viloyat bo‘limi yoxud Bog‘ot tumani bo‘limi mutasaddilari tomonidan haligacha biror bir munosabat bildirilmagan”, — deyiladi xabarda.
