Тошкент вилоятининг Бўстонлиқ тумани тоғли ҳудудларидаги йўллар четига нур қайтарувчи устунчалар ўрнатилди. Бу ҳақда Тошкент вилояти ИИББ ЙҲХБ ахборот хизмати «Дарё»га маълум қилди.
Хабар берилишича, ҳаракатланиш хавфсизлигини таъминлаш самарадорлигини ошириш мақсадида Бўстонлиқ туманининг тоғли ҳудудларида ҳайдовчиларга тунги вақтда, шунингдек, ёғингарчиликлар вақтида ҳам автомобиль йўли қатнов қисмининг чегарасини кўрсатиб турувчи нур қайтарувчи, эластик эгилувчан огоҳлантирувчи устунчалар ўрнатиш бошланди.
Туркияда ишлаб чиқарилган бу устунчалар аввалги бетон устунчаларнинг ўрнини эгалламоқда. Янги устунчалар транспорт воситаси бирор-бир сабаб билан йўлдан чиқиб кетиб, унга келиб урилганида эгилиб қолади ва транспорт воситасига жиддий шикаст етказмайди. Транспорт воситаси олингач эса у яна асл ҳолатига қайтади.
Мазкур янгиликни вилоятнинг барча шаҳар ва туманларида жорий этиш режалаштирилмоқда. Сабаби, устунчалардаги нур қайтарувчи мослама ёритилмаган йўлларда ҳам ҳаракатланиш хавфсизлигини таъминлашга ижобий ҳисса қўшади, дейилади бошқарма хабарида.
Изоҳ (0)