Ижтимоий тармоқларда Ўзбекистондаги мактабларда мардикорлик фанини киритиш ҳақида таклиф билдирилди. Такилфга кўра, мактабларда мардикорлик фанини киритиш керак. «Ҳар йили мактабни 700 минг ўқувчи битириб, уларнинг деярли ярми мардикорчиликка маҳкум», — дейилади ижтимоий тармоқларда билдирилган таклифда. Ўзбекистон Халқ таълими вазирлиги мазкур таклифга ўз муносабатини билдирди.
Вазирлик муносабатида қайд этилишича, мамлакатда 2018 йилда 11 йиллик таълим тизимига қайта ўтилгандан сўнг, 2019 йилда мактабни 200 мингдан зиёд ўқувчи битирган. 2020 йилда ҳам битирувчилар сони 200 мингдан зиёд бўлади.
Маълум қилинишича, жорий ўқув йилидан бошлаб мутлақо янги профессионал таълим тизими йўлга қўйилиб, 340 та касб-ҳунар мактаби, 147 та коллеж ва 143 та техникум ташкил этилади. Мазкур ўқув масканларида ёшларнинг касб ўрганиши кўзда тутилган.
Шунингдек, халқ таълими тизимида ўқув дастурлари қайта кўриб чиқилмоқда. Унда замонавий компетенцияларни ривожлантиришга катта аҳамият берилади.
Таъкидланишича, Ўзбекистонда денгизга тўғридан-тўғри чиқиш имкони бўлмагани учун товарларнинг экспорти қимматга тушади. Бу ҳолат инобатга олиниб, мамлакатда «1 миллион миллий дастурчи» лойиҳаси амалга оширилмоқда.
Халқ таълими вазирлиги америкалик ҳамкорлар билан IT-Nation лойиҳасини амалга оширмоқда. Лойиҳа доирасида мактабларда ахборот технологиялари ва информатика фанлари дастури ҳамда дарсликлари қайтадан яратилади.
Бундан ташқари, АҚШ ва Буюк Британия ташкилотлари билан English Speaking Nation лойиҳаси амалга оширилмоқда. Лойиҳа доирасида мактабларда инглиз тилини ўқитиш такомиллаштирилади. Бунинг натижасида битирувчилар ўз билимлари ёрдамида меҳнат бозорида ўз ўринларини топишлари учун имконият яратилади.
Изоҳ (0)