Xorazm viloyati Bog‘ot tumanining Qipchoq qishlog‘ida yashovchi 21 yoshli Yoqubboy Do‘smetov suvga cho‘kayotgan ayolning hayotini qutqarib qoldi, deb yozmoqda “Xabar.uz” nashri.

Foto: “Xabar.uz”

“Akam bilan “gaz zapravka”ga ketayotgan edik. Bizga qarama-qarshi yo‘nalishda kelayotgan mashina haydovchisi “Anavi ko‘prikda bir qiz o‘zini suvga tashlamoqchi bo‘lib turibdi”, deb qichqirdi. Biz o‘sha tomonga shoshildik. Yetib borganimiz zahoti yoshgina ayol o‘zini Polvonyop kanaliga otdi...”, — deydi yigit.

Eni salkam 70 metr bo‘lgan kanal suvi shitob bilan oqardi. Yo‘l-yo‘lakay kiyimlarini yechgancha kanalning quyiroq qismiga yugurib borgan Yoqubboy o‘zini suvga tashlaydi. Kanalning o‘rtarog‘iga suzib borgunicha ayol goh cho‘kib, goh suv yuziga qalqib chiqardi. Yigit uning kiyimidan mahkam ushlagancha qirg‘oqqa bazo‘r olib chiqadi...

So‘ng darhol eng yaqin xonadonga olib boriladi. Xonadon egalari shosha-pishgancha ayolga birlamchi yordam ko‘rsatishga kirishadi...

Xonadon sohibasi qizlari bilan birgalikda ayolga yordam ko‘rsatib, issiq choy ichiradi va qalin ko‘rpaga o‘rab qo‘yadi. Ayol sal o‘tmay o‘ziga keladi va ho‘ngrab yig‘lab yuboradi...

Aniqlanishicha, o‘zini suvga tashlagan ayol Hazorasp tumani Bo‘ston qishlog‘ida yashovchi 23 yoshli N.N. bo‘lib, mahalla faollaridan birining kelini ekan. Yaqinda ko‘zi yorigan yosh kelinchak oilaviy janjallar tufayli qattiq tushkunlikka tushgan va...

Bugungi kunda N.N Bog‘otda, o‘zi tug‘ilib o‘sgan ota-onasining uyida davolanmoqda. Voqea yuzasidan huquqni muhofaza qiluvchi idoralarning xabari bor yoki yo‘qligi ma’lum emas.

“Qish fasli qirchillab o‘tadigan Xorazmda yanvar oyida suvga sakrab, cho‘kayotgan odamni qutqarish uchun kishining vijdoni sof va iymoni kuchli bo‘lishi kerak. Yoqubboyga ham oson bo‘lgani yo‘q. U bu xaloskorligidan so‘ng isitmalab bir necha kun yotib qoldi. Lekin u qilgan savob ishidan mamnun, — deydi xaloskor yigitning qo‘shnisi Dilbar Olimova.

Avval Qoraqalpog‘istonda 2019-yil dekabr oyida 7 yoshli bolani suvdan olib chiqqan maktab o‘quvchisining mukofotlangani haqida xabar berilgan.