Хитойдан қайтган 2676 нафар ўзбекистонликда коронавирус аниқланмади

Ўзбекистон Республикаси Соғлиқни сақлаш вазирлиги ҳузуридаги Санитария-эпидемиологик осойишталик агентлиги томонидан маълум қилинишича, 2020 йилнинг 10 февраль ҳолатига кўра, Хитой Халқ Республикасида жами 40 235 киши, дунё бўйича 40 553 кишининг янги коронавирус инфекцияси билан касаллангани қайд этилган.

Қайд этилишича, касалликка чалинганлар сонининг кунлик ўсиши 8 фоизни ёки 2987 кишини ташкил этмоқда. 909 киши ушбу касалликдан вафот этган. Касаллик Хитойдан ташқари дунёнинг 25 та давлатида 318 кишида қайд этилган.

Қайд этилишича, Ислом Каримов номидаги Тошкент халқаро аэропортига 9 февраль, якшанба куни, хорижий давлатлардан 31 та самолётда келган 3829 киши текширувдан ўтказилган. «Ўзбекистон темир йўллари» АЖ марказий санитария-эпидемиология хизматига қарашли 6 та санитария-карантин пунктидан 4 та поездда жами 563 киши назоратдан ўтган. Давлат чегара кесишиш пунктларидаги санитария-карантин пунктлари орқали 34 550 киши термометриядан ўтказилган.

10 февраль, душанба кунигача Хитойда бўлиб қайтган 3447 нафар фуқаро тиббий кўрикдан ўтказилган. Улардан 2676 нафарида касалликнинг яширин даври (14 кун) якунлангани ва тиббий кўрик давомида ҳеч қандай коронавирус инфекцияси белгилари аниқланмаганлиги боис тиббий кузатув ишлари якунланган. Бугунги кунда 771 нафар фуқаро 14 кунлик тиббий кузатувга олинган.

Бу касаллик Республика ҳудудига кириб келиши ва тарқалишининг олдини олиш борасида амалга оширилаётган профилактик тадбирлар Санитария-эпидемиологик осойишталиги агентлиги томонидан назоратга олинган.

Хитой Миллий соғлиқни сақлаш комиссияси ахборотида мамлакатда янги турдаги коронавирус қурбонлари сони 908 кишига етгани маълум қилинди. 9 февраль, якшанба куни, касаллик оқибатида 811 киши вафот этгани ҳақида ахборот берилганди. Коронавирус билан касалланиш бўйича 40 171 ҳолат қайд этилган — 35 982 киши ҳозирда даволанишда, шундан 6 484 кишининг аҳволи оғир, яна 3 281 кишига шифохонадан уйига жавоб берилган.