Хитой ҳуқуқ-тартибот идоралари коронавируснинг тарқалиши билан боғлиқ бўлган мингдан ортиқ фирибгарлик ишларини фош этди, ҳолатлар бўйича 294 киши қўлга олинди, деб хабар беради «РИА Новости».
«Ҳозирги кунга келиб, бутун мамлакат бўйлаб жамоат хавфсизлиги органлари томонидан 1116 та фирибгарлик ҳолати аниқланган ва фош қилинган, 294 киши қўлга олинган, ўзлаштирилган маблағлардан 6,6 миллион юань мусодара қилинган», — дейилади хабарда.
Агентлик маълумотларига кўра, ҳуқуқни муҳофаза қилиш органлари учта асосий фирибгарлик схемасини аниқлашга муваффақ бўлди.
Энг кўп учраган ҳолатда жиноятчилар ҳимоя ниқоби тақчиллигидан фойдаланган. Улар ниқоб сотиши ҳақида ижтимоий тармоқлар орқали эълон берган. Харидорлардан пул келиб тушгач эса шунчаки телефон рақамини ўзгартирган ёки харидорларни блоклаган.
Кейинги ҳолатда эса фирибгарлар хайрия ташкилоти эканлигини маълум қилиб, ижтимоий тармоқлар орқали пул йиғган. Улар йиғилган маблағ коронавирус тарқалишининг олдини олиш учун ишлатилишини айтган. Улар кўп миқдорда пул тўплагач, ўз-ўзидан ғойиб бўлган.
Шунингдек, фирибгарлар турли мессенжерлардаги гуруҳлар орқали ҳам касалликка қарши курашиш важи билан пул йиғган.
Маълумот учун, Хитойда тарқалган коронавирусдан вафот этганлар сони 565 кишига етди. Ухань шаҳридаги вирусология институти 2016 йилдаёқ Американинг Gilead Sciences биотехнологик компанияси томонидан яратилган «Ремдизивир» учун патент олиш учун талабнома киритди.
Изоҳ (0)