Хитой коронавирус тарқалиши сабабли мамлакатга нисбатан кескин чеклов чораларини кўрган давлатларга нисбатан норозилигини билдирди. «РИА Новости»нинг ёзишича, бу ҳақда Хитой Ташқи ишлар вазирлиги расмий вакили Хуа Чуньин 6 февраль, пайшанба куни, ўтказилган онлайн-брифингда маълум қилган.
«Коронавируснинг янги тури туфайли келиб чиққан пневмония тарқалгандан сўнг Хитой касаллик кенг тарқалишининг олдини олиш ва назорат қилиш учун энг кенг қамровли ва қатъий чораларни кўрди ва бу ҳаракатлар ҳозирда ижобий натижаларни бермоқда», — деган ТИВ вакили.
У Жаҳон соғлиқни сақлаш ташкилоти Хитой ҳукумати томонидан касаллик тарқалишининг олдини олиш бўйича кўраётган чораларини юқори баҳолаганини ва Хитойга сафар ва савдо-сотиқни чеклашни тавсия этмаслигини бир неча бор таъкидлаганини айтган.
Қатор давлатлар кескин чоралар кўрганидан сўнг Халқаро фуқаро авиацияси ташкилоти (ХФАТ) ҳам мамлакатларни ЖССТ тавсияларига риоя қилишга чақирган.
«Биз ЖССТ ва ХФАТнинг профессионал тавсияларини инкор этган тегишли давлатларга норозилик билдирамиз», — деб таъкидлаган Хуа Чуньин. Унинг сўзларига кўра, бу давлатларнинг ҳаракатлари нафақат касаллик тарқалишининг олдини олишда ёрдам бермайди, балки жамиятда сунъий равишда ваҳима келтириб чиқаради. Бу эса нормал халқаро алмашинув ва ҳамкорлик учун жиддий тўсиқ бўлиб қолади.
Аввалроқ Хитой ТИВ вакили АҚШни коронавирус тўғрисида атайлабдан ваҳима тарқатишда айблаганди. Хуа Чуньиннинг сўзларига кўра, АҚШ консуллик ходимларини Ухандан биринчи бўлиб эвакуация қилди, биринчи бўлиб элчихона ходимларининг бир қисмини Хитойдан олиб чиқиш истагини билдирди ҳамда ЖССТ тавсияларига зид равишда барча Хитой фуқароларини АҚШга киришни тўлиқ тақиқлашини эълон қилди.
Изоҳ (0)