Amazon асосчиси Жефф Безос 31 январь ва 3 февралда компаниянинг ўзига тегишли 1,74 миллиард долларлик акцияларини сотди. Бу ҳақда Forbes нашри маълумотларига асосланиб, «РБК» хабар берди.
Солиқлар тўлангандан кейин миллиардернинг ушбу амалиётдан олган соф даромади 1,3 миллиард долларни ташкил қилган.
Безос акцияларини нима учун сотишга қарор қилгани номаълум. У ҳар йил миллиард долларлик акцияларини сотади. Мисол учун, 2019 йил июль августида тадбиркор 2,8 миллиард долларлик акцияни сотиб юборган. Ўшанда Amazon компанияси томонидан бунга ҳеч қандай изоҳ берилмаган.
2017 йилда Безос коинот тадқиқотлари билан шуғулланувчи Blue Origin компаниясига пул тўплаётганини маълум қилганди.
30 январда Amazon акциялари нархи компаниянинг чораклик ҳисоботи эълон қилингандан кейин жадал юқорилаган. Ўшанда Безос электрон савдолар вақтида 15 дақиқа ичида 13 миллиард долларга бойиб, умумий бойлиги 129,5 миллиард долларга баҳоланганди.
Forbes маълумотларига кўра, ҳозирда тадбиркорнинг бойлиги 125,8 миллиард долларни ташкил қилмоқда.
Мавзуга доир: Жефф Безос 15 дақиқада 13,2 млрд доллар ишлаб топди
Изоҳ (0)