Самарқандда 2019 йилда 996 та божхона қонунчилиги бузилиши аниқланди

Самарқанд вилояти божхона бошқармаси томонидан 2019 йил давомида 880 миллиард сўмдан зиёд божхона тўловлари ундирилиб, давлат бюджетига ўтказилган. Бу ҳақда «Дарё»га вилоят божхона бошқармаси ахборот хизмати маълум қилди.

Хабар қилинишича, товарлар экспорти ва импортини амалга ошириш жараёнида 52 мингдан ортиқ божхона юк декларациялари расмийлаштирилган. Вилоятдаги корхоналарга божхона тўловларидан 2,9 триллион сўмлик имтиёзлар қўлланилган.

2019 йилда Самарқанд вилоятидан 362 миллион доллар қийматидаги товарлар хорижга экспорт қилинган. 2018 йилга нисбатан солиштирилганда бу кўрсаткич 28 фоизга ошган.

Ўтган йил давомида бошқарма ходимлари томонидан 996 та божхона қонунчилиги бузилиши ҳолати аниқланган. Улар бўйича 16,89 миллиард сўмлик товар моддий бойликлар ушлаб қолинган. 2018 йилга нисбатан солиштирилганда бу кўрсаткич 14,61 миллиард сўмга ошган.

Аниқланган 32 та ҳолат бўйича Жиноят кодексининг турли моддалари билан жиноят ишлари қўзғатилган. Ҳуқуқбузарликлар профилактикаси йўналишида жами 1127 та тадбир ташкил этилди.

Самарқанд вилояти божхона бошқармасига қарашли божхона постлари томонидан 2019 йилда давлат чегараси орқали ҳаракатланган 42 120 та енгил автотранспорт воситаси, 1872 та юк автомашинаси, 280 та автобус, 14 693 та темир йўл вагони ва 2957 та авиатранспорт божхона назорати ва расмийлаштирувидан ўтказилган.