Қашқадарё вилоятининг Касби туманида яшовчи С.Х. ИИБ тергов бўлими бошлиғига пора таклиф қилди. Бу ҳақда «Дарё»га вилоят ИИБ ахборот хизмати раҳбари Ирода Расулова маълум қилмоқда.
2020 йил 2 февраль куни Касби тумани ИИБ ходимлари томонидан олиб борилган профилактик тадбирда «Хўжаҳайрон» маҳалласи Бойлар кўчасида яшовчи фуқаро С.Х.нинг яшаш уйидаги сомонхонадан қўлбола усулда ясалган мой жувоз ускунаси чиққан. Аниқланишича, фуқаро қўлбола жувоз ёрдамида чигитдан ёғ ва шрот еми ишлаб чиқарган.
Фуқаро С.Х. мазкур қилмиши фош бўлмаслиги учун туман ИИБнинг тергов бўлими бошлиғига пора таклиф қилган. Тергов бўлими бошлиғи майор Алишер Муҳаммадиев эса 2020 йил 3 февраль куни бу ҳақда раҳбариятга маълум қилиб, фуқаро С.Х. пора таклиф қилаётганини билдирган.
Вилоят ИИБнинг иқтисодий жиноятларга қарши курашиш бошқармаси Касби тумани бўлими ва Касби тумани прокуратураси ходимлари билан ўтказилган тезкор тадбир давомида фуқаро С.Х. 7,5 миллион сўм ва 200 АҚШ долларини майор А.Муҳаммадиевнинг хизмат хонасида бераётган вақтида далилий ашё билан ушланган.
Мазкур ҳолат юзасидан Касби туман прокуратураси томонидан терговга қадар текшириш ҳаракатлари олиб борилмоқда.
Изоҳ (0)