3 февраль куни Тошкентда бўлиб ўтган матбуот анжуманида АҚШ давлат котиби Майкл Помпео Ўзбекистонда Хитой инвестициялари билан рақобат ҳақида сўзлаб берди, деб ёзади Spot.
Associated Press журналисти Мэт Ли Помпеога давлат котиби Марказий Осиёга ташрифи давомида Хитой ва унинг инвестицияларининг ушбу мамлакатларга таъсирини ташвишланиб тилга олгани, айниқса Huawei томонидан 5G технологияси жорий этилишини алоҳида қайд этгани ҳақида эслатди.
«Марказий Осиёнинг Хитойга яқинлиги ва улар (Марказий Осиё мамлакатлари) ҳали ҳам ривожланиб бораётгани ва инфратузилмага сармоя киритишга эҳтиёжмандлиги юзасидан ташвишланишга асос борми?», — деб сўради журналист.
Майкл Помпео бунга жавобан АҚШ Ўзбекистонни шаффоф қонун устуворлиги ва инвестициялар учун қулай муҳит яратишда қўллаб-қувватлашини маълум қилди.
«Биз АҚШ компаниялари Ўзбекистонда янги имкониятлар ва янги иш ўринлари яратишни давом эттириш имконига эга бўлишини истаймиз»,— деди Помпео.
«Шунинг учун бизнинг вазифамиз аниқ, бу ерда буюк икки томонлама шерик бўлиш, нафақат икки томонлама, балки кўп томонлама асосда ишлаш», — дея сўзларини давом эттиради Помпео.
«Биз аминмизки, Америка компаниялари Ўзбекистонга келганида биз бу ерда маҳаллий аҳоли учун иш ўринларини яратамиз, маҳаллий қоидаларга риоя қиламиз, атроф-муҳитни ифлослантирмаймиз. Биз яхши фуқаролармиз, биз яхши қўшнилармиз. Америка компаниялари ва Америка инвестициялари ушбу мамлакатнинг мустақиллиги ва суверенитети талабига жавоб», — дейди Помпео.
Шунингдек, у штатлар дунёнинг исталган нуқтасида адолатли рақобатни ижобий қарши олишини маълум қилди.
«Бошқа давлатлар шаффофлик ва очиқлик қоидаларига риоя қилган ҳолда, давлат томонидан ҳомийлик қилинган сиёсий сабабларга кўра эмас, балки ҳақиқий бозор битимларини амалга оширадиган рақобат, — дея АҚШ давлат котиби таъкидлади.
«Бунда давлат томонидан сиёсий мақсадларни кўзлаб ҳомийлик қилинадиган рақобат эмас, балки бошқа давлатлар ҳам шаффофлик ва ошкоралик қоидаларига риоя қилган ҳолда ҳақиқий бозор битимларини амалга оширадиган вазиятдаги рақобатни қўллаб-қувватлаймиз», — дейди Помпео.
Помпеонинг сўзларига кўра, у Ўзбекистон билан АҚШ ўртасидаги икки томонлама муносабатлар мамлакатлар ўртасидаги яқин ҳамкорликнинг яхши натижалари туфайли ўсишда давом этишига ишонч билан минтақани тарк этади.
Эслатиб ўтамиз, АҚШ давлат котиби Майкл Помпео 2 февраль куни Ўзбекистонга келди. У дастлаб Тошкент шаҳар бош имом хатиби Нуриддин Холиқназаров ва бошқа диний фаоллар билан учрашди. Кейин эса Ўзбекистон ташқи ишлар вазири Абдулазиз Комилов билан музокара ўтказди. Ушбу музокара чоғида АҚШ Афғонистон билан муносабатларни мустаҳкамлаш учун Ўзбекистонга 1 млн доллар ажратиши маълум бўлди.
Помпео шунингдек Тошкентда «C5+1» шаклидаги вазирлар учрашувида иштирок этди. Шундан сўнг Майкл Помпеони Ўзбекистон Президенти Шавкат Мирзиёев қабул қилди.
Изоҳ (0)