3 февраль куни Тошкент шаҳар ҳокимининг ўринбосари Даврон Ҳидоятов Жаҳон банкининг Розанна Нитти бошчилигидаги шаҳарлаштириш бўйича экспертлар гуруҳи билан учрашув ўтказди. Бу ҳақда пойтахт ҳокимлиги матбуот хизмати хабар берди.
Учрашувда маълум қилинича, 24 февралдан Жаҳон банки гранти асосида Тошкентнинг ривожланиш барқарорлигини ўрганишга қаратилган лойиҳа ишга туширилади. Мутахассислар бир йил давомида Тошкент шаҳридаги ўзгариш ва янгиланишлар, имконият ва шароитларни ўрганиб, таҳлил қилиб, пойтахтни барқарор ривожлантириш бўйича аниқ чора-тадбирлар борасида ўз хулосаларини тайёрлайди ва шу асосда ҳаракатлар стратегияси ишлаб чиқилади.
Мазкур лойиҳа ўз ичига нафақат консалтинг, балки шаҳарнинг турли тузилмаларида фаолият юритувчи ходимлар учун кўп сонли семинарларни ўтказишни ҳам назарда тутади. Барча ишлар шаҳар бошқармалари ва манфаатдор идоралар билан ҳамкорликда олиб борилиши режалаштирилган. Шу мақсадда махсус ишчи гуруҳ ташкил этилмоқда. Улар иштирокида тошкентлик мутахассисларни ўқитиш, шаҳар инфратузилмаси ва бошқарувининг ташкилий тузилмасини ўрганиш, мегаполисни ривожлантиришнинг институционал ва ижтимоий масалаларини кўриб чиқиш каби ишлар ташкил этилади. Ишнинг натижасида Жаҳон банкига барқарор ривожланиш учун муҳим соҳаларни қўллаб-қувватлаш учун кредит ажратишга доир тавсиялар берилади.
Ҳокимлик вакиллари ўз навбатида шаҳарнинг ўсиши ва ундаги кенг кўламли ўзгаришларни инобатга олган ҳолда инвесторларни жалб қилиш ҳамда инвестиция ва кредитларни жалб қилиш учун энг аниқ йўналишларни белгилаб берилишига умид билдирди. Тошкент шаҳар ҳокими ўринбосари Даврон Ҳидоятов ижтимоий соҳани ўрганиш ва ривожлантиришга алоҳида эътибор қаратиш таклифини илгари сурган. Розанна Нитти эса ушбу таклифни маъқуллаб, ўрганилаётган муаммолар доирасида айнан ижтимоий соҳа чуқур таҳлил қилинишини таъкидлаган.
Шунингдек, Жаҳон банкининг вакиллари билан учрашув жараёнида Даврон Ҳидоятов Олма-отада урбанизация мавзусида ўтказиладиган анжуманда маъруза билан иштирок учун таклиф этилди.
Изоҳ (0)