Тошкент вилоятининг Бўстонлиқ туманида Lacetti ойнасини қорайтириб, инспекторга Captiva’нинг тонировка рухсатномасидан нусха кўрсатган ҳайдовчиси қўлга тушди. Бу ҳақда «Дарё»га Бош прокуратура матбуот хизмати хабар берди.
Маълум бўлишича, ЙПХ инспектори Lacetti машинасини текшириш учун тўхтатган. Машина ҳужжатлари кўздан кечирилганда унинг ойналарининг тусини ўзгартиришга рухсат берувчи рухсатнома инспекторда шубҳа уйғотган.
Олиб борилган дастлабки суриштирув жараёнида рухсатнома Бухоро вилоятида рўйхатда турувчи Captiva автомашинага берилган бўлиб, Lacetti ҳайдовчиси ушбу рухсатномани нусха кўчириш йўли билан сохталаштирганлигига иқрор бўлган.
Ҳайдовчининг ҳаракатларида Жиноят кодексининг 228-моддасида (Ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) кўрсатилган жиноят аломатлари мавжудлиги сабабли унга нисбатан тўпланган ҳужжатлар қонуний қарор қабул қилишлик учун Тошкент вилояти Бўстонлиқ тумани ИИБ Тергов бўлимига юборилган бўлиб, ҳолат юзасидан дастлабки тергов ҳаракатлари олиб борилмоқда.
Изоҳ (0)