Сирдарё вилоятидаги даҳшатли ЙТҲда 5 киши ҳалок бўлди

Сирдарё вилоятида Cobalt ва Damas иштирокидаги даҳшатли ЙТҲда 5 киши ҳалок бўлди, деб хабар бермоқда ИИВ ҳузуридаги Тергов департаменти.

Воқеа 1 февраль куни соат тахминан 08:30 ларда содир бўлган. 19 ёшли Ш.Б. ўзининг Cobalt машинасида Гулистон шаҳар 4-мавзе Гулистон кўчаси бўйлаб ўтган автомобиль йўлида Гулистон—Зарбдор йўналиши бўйича ҳаракатланиб кетаётганида, бошқарувни йўқотиши оқибатида йўлнинг қарама-қарши йўналишига ўтиб кетиб, 21 ёшли С.М. ҳайдаб кетаётган Damas билан тўқнашган.

Оқибатда Damas ҳайдовчиси С.М. йўловчилари 55 ёшли Ш.А., 27 ёшли Д.Э., 28 ёшли М.С. ҳодиса содир бўлган жойда вафот этган. Яна 3 нафар шахс шифохонага ётқизилган. Шунингдек, 24 ёшли С.А.га кўрсатилган тиббий ёрдамига қарамай, шифохонада вафот этган.

Мазкур ҳолат юзасидан Сирдарё вилояти ИИБ ҳузуридаги Тергов бошқармаси томонидан Жиноят кодекининг 266-моддаси 3-қисми «а» банди (Одамлар ўлимига сабаб бўлган транспорт воситасини бошқарувчи шахс томонидан транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган. Дастлабки тергов ҳаракатлари давом эттирилмоқда.