Жаҳон Соғлиқни сақлаш ташкилоти Хитойда коронавирус инфекциясини эпидемиясини фавқулодда ҳолат деб тан олди, 2020 йил 31 январь ҳолатга Хитойда коронавирус (2019-nCoV тури) билан касалланган беморлар 9720 нафарни ташкил қилган, 1500 нафар фуқаро оғир ҳолатда даволанмоқда, 213 нафар фуқаро ушбу касалликдан вафот этган.
Ушбу касалликни Ўзбекистонга кириб келиши ва тарқалишини олдини бўйича олиб борилаётган ишларни янада кучайтириш мақсадида 28 январь куни Вазирлар Маҳкамасида Бош вазир бошчилигида Эпидемияга қарши кураш фавқулодда комиссиясининг йиғилиши ўтказилди. Унда қилинаётган ишлар муҳокама қилиниб, қўшимча амалга оширилиши керак бўлган профилактик чора-тадбирлар белгиланиб ижрога қаратилди. Бу ҳақда Санитария-эпидемиологик осойишталик агентлиги жамоатчилик билан алоқалар бўлими хабар берган.
Хабарда Соғлиқни сақлаш вазирлиги ҳузуридаги Санитария-эпидемиологик осойишталиги агентлигида ташкил қилинган штаб 24 соат давомида фаолият олиб бораётгани, агентлик мутахассислари томонидан ишонч телефонлари орқали коронавирусни олдини олиш борасида Хитойдан келаётган талабалар, уларнинг ота-оналари, тадбиркорлар ва бошқа соҳа ходимларига тегишли тушунтириш ҳамда тавсиялар бериб борилаётгани қайд этилган.
Коронавируснинг тарқалишини олдини олиш бўйича жорий йилнинг 31 январь куни Тошкент врачлар малакасини ошириш инситутида коронавирус инфекциясини этиологияси, клиникаси ва профилактикаси ҳамда касалликка гумон қилинганда тиббий ходимларни тезкор ҳаракатлари мавзусида Қорақалпоғистон Республикаси Соғлиқни сақлаш вазирлиги, вилоятлар Соғлиқни сақлаш бошқармалари ва Тошкент шаҳар Соғлиқни сақлаш Бош бошқармасининг реаниматологлари, инфексионистлари ва Санитария-эпидемиологик осойишталик марказларининг эпидемиологлари ўртасида ўқув-семинари ўтказилган. Барча маъмурий ҳудудларда реаниматолог, инфексионист, эпидемиологлардан иборат 3 тадан тезкор ҳаракатлар бригадалари ташкил этилди, шунингдек мазкур ўқув-семинарда Жаҳон соғлиқни сақлаш ташкилотининг вакиллари иштирок этган.
Шунингдек, агентлик жорий йилнинг 31 январь куни I.Каримов номидаги Тошкент халқаро аэропорт орқали хориждан 38 та самолёт учиб келиб, 4194 нафар фуқаро санитария-карантин пунктларида термометриядан ўтказилгани, шулардан 84 нафари Хитойда ўқийдиган талабалар эканлиги ҳақида маълумот берган. Термометриядан ўтказилган фуқаролар орасида 1 нафар Россиядан учиб келган фуқарода тана ҳарорати юқорилиги аниқланган, шифокорлар томонидан эпидемиологик суриштирув ўтказилганда тана ҳарорати кўтарилган бемор, коронавирус касаллигига гумон қилинган ёки касаллик билан касалланган беморлар билан мулоқотда бўлмаганлиги аниқланган.
Темир йўллари АЖ марказий СЕСига қарашли 6 та СКПдан 5 та поездда 953 нафар фуқаролар ўтган ва улар ўртасида тана ҳарорати кўтарилган беморлар аниқланмаган.
Давлат чегара пости орқали кўплаб йўловчи ўтувчи СКПлар Тошкент вилоятининг «Ғишт-кўприк», «Ойбек», Сурхондарёнинг «Айратон», «Гулбаҳор» ва Дарё порти ҳамда Андижон вилоятининг «Дўстлик» СКПлари орқали 2158 та автотранспортлар, 23570 нафар фуқаро ўтказилган, улар орасида юқумли касалликка гумон қилинган беморлар аниқланмаган.
Агентликнинг вирусология лабораториясига коронавирусга текшириш учун 21 нафар фуқародан намуналар олиб келинган, намуналар орасида коронавирус касаллигининг вируси топилмади. Бугунги кунга қадар республика фуқаролари орасида коронавирус инфекцияси қайд этилмади.
Хитой Халқ Республикасида коронавирус инфекцияси бўйича кузатилаётган мураккаб эпидемик вазият, бу касалликни республика ҳудудига кириб келиши ва тарқалиб кетишини олдини олиш борасида амалга оширилаётган профилактик тадбирлар Санитария-эпидемиологик осойишталиги агентлиги томонидан назоратга олинган, дейилади хабарда.
Изоҳ (0)