Қашқадарё вилоятининг Косон туманидаги мактабларда ўқувчилар 4 номдаги журналга обуна бўлишга мажбурланаётгани айтилмоқда.
Бу ҳақда «Дарё»га шикоят қилган мурожаатчига кўра, журналлар обунасига мажбурланаётган ўқувчилар 1—6-синф ўқувчилари ҳисобланади.
— Ўзим мактабга бориб вазиятни ўргандим, обунага пул мажбурий тарзда йиғиляпти, — дейди мурожаатчи.
Мурожаатчининг маълум қилишича, ўқувчини обунага мажбурлаш туманнинг Қозоқли қишлоғидаги 14-мактабда содир бўляпти.
— Энг ачинарлиси 1-синф ўқувчиси ҳам обунага мажбурланяпти, — дейди мурожаатчи. — Давлат мактабидаги масъуллар қаерга қараяпти?
«Дарё»га тақдим этилган суратдан англашилишича, 4 та нашр номи ёзилган қоғозда барча нашрлар нархи бир хил эканлиги қайд этилган. Нашрларнинг бир йиллик обуна баҳоси 90 минг сўмни ташкил этса, 3 ойлик обуна нархи 22 минг 500 сўмлиги ёзилган.
— Мазкур қишлоқдаги кўпчилик ота-оналар ишламайди, ҳатто 22 минг сўмни беришга ҳам қийналади, — дейди мурожаатчи.
Эслатиб ўтамиз, сўнгги кунларда Косон туман халқ таълими бўлими интернет сайтларида кўп тилга олинди. Аввал 98-мактаб директори пора билан қўлга олинган бўлса, сўнгра вилоят ҳокими танқидига ҳам дуч келди. Мазкур масалага бағишланган матбуот анжуманида эса бўлим мудири Соиб Давидов ҳатто бўлим расмий сайти манзилини ҳам билмай, Зоир Мирзаевнинг матбуот котиби эътирозига сабабчи бўлганди.
Изоҳ (0)