Тошкент шаҳар ҳокимиятида 28 январь куни Жанубий Кореянинг CM Entech компанияси вакиллари ва Осиё Тараққиёт банки (ОТБ) маслаҳатчилари билан учрашув бўлиб ўтди. Учрашувда Тошкент шаҳрининг иситиш тизимини модернизация қилиш бўйича лойиҳа муҳокама қилинди. Бу ҳақда Тошкент шаҳар ҳокимлиги матбуот хизмати хабар берди.
Маълум қилинишича, томонлар CM Entech компанияси билан Тошкент шаҳрида иситиш тизимини модернизация қилиш лойиҳаси бўйича давлат-хусусий шерикликни амалга ошириш масаласини муҳокама қилди. Хусусан, Мирзо Улуғбек туманидаги 2-иссиқлик марказини реконструкция қилиш таклиф қилинди. Марказда ёпиқ иссиқлик таъминоти тизимига ўтиш, эскирган ва ишдан чиққан иссиқлик тармоқларини модернизация қилиш, бошқа жойга кўчириш, «ақлли» иссиқлик ўлчаш мосламалари ва «ақлли» иситиш тизимини жорий этиш режалаштирилган.
Тошкент шаҳар ҳокимининг ўринбосари — Уй-жой коммунал хизматларини кўрсатиш Бош бошқармаси бошлиғи Бахтиёр Раҳмонқулов мазкур ишлар тарифларнинг ошишига олиб келмаслиги кераклигини таъкидлади.
Қайд этилишича, томонлар февраль ойининг биринчи ҳафтасида компания томонидан лойиҳа концепциясининг тақдим этилишга келишиб олди. Лойиҳанинг қиймати тахминан 70—100 миллион долларга баҳоланмоқда, аниқ қиймат техник-иқтисодий асосни ўрганиш ишларидан кейин аниқланади.
Таъкидланишича, ушбу лойиҳанинг амалга оширилиши газ нархини пасайтиришга ва ташиш пайтида иссиқлик йўқотилишини 30 фоизга камайтиришга хизмат қилиши кутилмоқда.
Осиё Тараққиёт банки Тошкент шаҳри иссиқлик таъминоти тизимини узоқ муддатли шартнома асосида ишончли бошқарувга ўтказиш бўйича лойиҳанинг битимлари бўйича эксклюзив маслаҳатчи ҳисобланади. ОТБнинг маслаҳатчи сифатидаги роли хорижий компаниялардан тушган таклифларни техник, ҳуқуқий ва молиявий баҳолашдан иборат.
Изоҳ (0)