Ўзбекистонда Хитойдан келган фуқаролар тиббий текширувдан ўтказилмоқда

Бугунги кунда коронавирус инфекцияси жиддий фазага кўтарилди. Ушбу касаллик 16 та давлатда тарқалгани қайд этилмоқда. Хитойда коронавирусдан вафот этганлар сони 30 январь ҳолатига кўра 170 кишига, вирусни юқтириб олганлар эса 7711 кишига етди.

ССВ матбуот хизматининг хабар беришича, Ўзбекистонга ушбу инфекциянинг кириб келиши ва тарқалишининг олдини олиш мақсадида Давлат чегара постларидан ўтаётган фукоралар тиббий назорат кўригидан ўтказилмоқда, шунингдек, тепловизор ёрдамида йўловчиларнинг тана ҳарорати масофадан туриб ўлчанмоқда ва умумий ҳолати текширилмоқда. Ушбу тадбирларни амалга ошириш учун нафақат санитария назорат пунктлари тиббиёт ходимлари, балки шифокор инфексионистлар ҳам жалб этилган.

Таъкидланишича, сўнгги 10 кун ичида ана шундай текширувлар натижасида Хитойдан келган фуқароларнинг 59 нафаридан вирусологик текширув ўтказиш учун намуналар олинган. 19 нафар шахс эса Вирусология илмий текшириш институти клиникасида ташкил этилган бўлимга мурожаат этган ва тиббий назоратдан ўтказилган.

Айни пайтга қадар уларнинг биронтасида ҳам коронавирус инфекцияси аниқланмаган. Бундан ташқари, Хитойдан келган фукоралар яшаш манзили бўйича оилавий поликлиникалар тиббиёт ходимлари ва эпидемиологлар томонидан 14 кун давомида назоратга олинмоқда.

Қайд этилишича, Санитария-эпедимиологик осойишталик агентлиги томонидан грипп ва бошқа ўткир респиратор инфекциялар бўйича ҳам мониторинг олиб борилмоқда. Натижаларга кўра, грипп ва бошқа ўткир респиратор инфекциялар бўйича ўтган йилга нисбатан бир мунча мавсумий кўтарилиш кузатилган бўлса-да, ушбу касалликлар бўйича ўлим ҳолатлари қайд этилмади.

Эслатиб ўтамиз, 28 январь куни Ўзбекистон Бош вазири Абдулла Арипов мамлакатга Хитойда тарқалган янги турдаги коронавирус кириб келишининг олдини олиш масалаларига бағишланган йиғилиш ўтказган.

Аввалроқ, Ўзбекистон соғлиқни сақлаш вазирининг биринчи ўринбосари Баҳодир Юсупалиев коронавируснинг Ўзбекистонга кириб келишининг олдини олиш бўйича қилинаётган ишлар хусусида маълумот берган эди.

Шунингдек, Соғлиқни сақлаш вазирлиги коронавируснинг Ўзбекистонга кириб келгани ҳақидаги гап-сўзларни инкор этган эди. Ҳозирда Хитойда коронавирус билан касалланганлар сони 6 мингдан ошиб кетди. Бунинг ортидан Хитой—Ўзбекистон авиарейсига бўлган талаб беш бараварга ортди.

Ўзбекистон Ташқи ишлар вазирлиги фуқароларга Хитойга хизмат, туристик ва бошқа мақсадларда ташриф буюрмасликни тавсия қилмоқда.