Қашқадарё вилоятининг Деҳқонобод туманида оғир ижтимоий вазиятга тушиб қолган хотин-қизларга берилган уйлар ижарага берилиб, фойдаланиб келингани аниқланди. Бу ҳақда «Дарё»га Деҳқонобод туман ҳокимлиги ахборот хизмати хабар беряпти.
Маълум қилинишича, 2018 йил туманда вилоят касаба уюшма ва маҳалла жамғармаси томонидан 4 нафар хотин-қизга бепул уйлар берилган. Шунингдек, 2019 йил эса 2 сотихли намунали уйлар имтиёзли кредит асосида 10 та уй эса Вазирлар Маҳкамасининг 285-сонли қарорига кўра тарқатилган.
Туман ҳокими ўринбосари ва «Истиқлол» маҳалла фуқаролар йиғини раиси иштирокида ўтказилган кузатув жараёнида маҳалладаги «дом»дан 4 нафар оғир ижтимоий аҳволдалиги айтилган хотин-қизларга берилган уйларнинг 3 таси ижарачиларга берилгани аниқланган. Бири эса бўш турган. Ижарада яшовчиларнинг айтишича, уйларнинг ижара нархи 200-250 минг сўмни ташкил этади.
— Мазкур «дом»дан берилган 4 та уй туман ҳокимлигига такрор-такрор мурожаат қилиниб, «яшашга уйим йўқ, ижтимоий аҳволим ёмон», деб мурожаат қилувчи хотин-қизларга берилган. Аммо уларнинг 3 нафари — Муҳаббат Алмуродова, Насиба Эсонқулова, Гўзал Қурбоновалар берилган уйини ижарага бериб, фойдаланиб келган бўлса, 1 нафари — Зулҳумор Каримова умуман яшамаган. Шу боисдан ҳам уларга туман ҳокимлиги томонидан огоҳлантириш хатлари берилиб, агарда мазкур уйларда ўзлари яшамаса, олиб қўйилиши билдирилди, — дейилади туман ҳокимлиги ахборот хизмати хабарномасида.
Ушбу уйда яшовчи Одил Норматовнинг айтишича, мазкур уйлар ҳокимлик томонидан берилганидан бери ижарага бериб, фойдаланиб келинади.
— Уй эгалари бу ерда умуман яшамаган, фақат ижарага берилган, — дейди Одил Норматов. — Бу аёллар ҳокимликка дод-вой қилиб бориб уй олишга эришган ва уйни ижарага бериб даромад қилишяпти.
Аниқлик киритилишича, мазкур уйларнинг ҳар бири туман ҳокимлиги томонидан сотиб олинган ва таъмирланиб, жиҳозлари билан ижтимоий оғир аҳволдаги хотин-қизларга берилган. Ҳар бир уй харажати 120 миллион сўмни ташкил этган.
Изоҳ (0)