Qashqadaryo viloyatining Dehqonobod tumanida og‘ir ijtimoiy vaziyatga tushib qolgan xotin-qizlarga berilgan uylar ijaraga berilib, foydalanib kelingani aniqlandi. Bu haqda “Daryo”ga Dehqonobod tuman hokimligi axborot xizmati xabar beryapti.
Ma’lum qilinishicha, 2018-yil tumanda viloyat kasaba uyushma va mahalla jamg‘armasi tomonidan 4 nafar xotin-qizga bepul uylar berilgan. Shuningdek, 2019-yil esa 2 sotixli namunali uylar imtiyozli kredit asosida 10 ta uy esa Vazirlar Mahkamasining 285-sonli qaroriga ko‘ra tarqatilgan.
Tuman hokimi o‘rinbosari va “Istiqlol” mahalla fuqarolar yig‘ini raisi ishtirokida o‘tkazilgan kuzatuv jarayonida mahalladagi “dom”dan 4 nafar og‘ir ijtimoiy ahvoldaligi aytilgan xotin-qizlarga berilgan uylarning 3 tasi ijarachilarga berilgani aniqlangan. Biri esa bo‘sh turgan. Ijarada yashovchilarning aytishicha, uylarning ijara narxi 200-250 ming so‘mni tashkil etadi.
— Mazkur “dom”dan berilgan 4 ta uy tuman hokimligiga takror-takror murojaat qilinib, “yashashga uyim yo‘q, ijtimoiy ahvolim yomon”, deb murojaat qiluvchi xotin-qizlarga berilgan. Ammo ularning 3 nafari — Muhabbat Almurodova, Nasiba Esonqulova, Go‘zal Qurbonovalar berilgan uyini ijaraga berib, foydalanib kelgan bo‘lsa, 1 nafari — Zulhumor Karimova umuman yashamagan. Shu boisdan ham ularga tuman hokimligi tomonidan ogohlantirish xatlari berilib, agarda mazkur uylarda o‘zlari yashamasa, olib qo‘yilishi bildirildi, — deyiladi tuman hokimligi axborot xizmati xabarnomasida.
Ushbu uyda yashovchi Odil Normatovning aytishicha, mazkur uylar hokimlik tomonidan berilganidan beri ijaraga berib, foydalanib kelinadi.
— Uy egalari bu yerda umuman yashamagan, faqat ijaraga berilgan, — deydi Odil Normatov. — Bu ayollar hokimlikka dod-voy qilib borib uy olishga erishgan va uyni ijaraga berib daromad qilishyapti.
Aniqlik kiritilishicha, mazkur uylarning har biri tuman hokimligi tomonidan sotib olingan va ta’mirlanib, jihozlari bilan ijtimoiy og‘ir ahvoldagi xotin-qizlarga berilgan. Har bir uy xarajati 120 million so‘mni tashkil etgan.
Izoh (0)