Тошкентдаги АҚШ элчихонаси Twitter’даги расмий саҳифаси орқали блогер Нафосат Оллошукурованинг Ўзбекистон ҳудудини ўз ихтиёри билан мустақил равишда тарк этганини билдирди. Аввал блогернинг ўзи элчихона томонидан унга кўрсатилган ёрдам учун миннатдорлик изҳор этганди.
«АҚШ элчихонаси вакиллари Оллошукурова мамлакатни тарк этишидан аввал у билан учрашган ва блогернинг кейинги тақдирини кузатиб боради», — дейилади элчихона хабарида.
«АҚШ сўз эркинлиги масаласини қатъият билан қўллаб-қувватлашда давом этади — бу ҳар қандай жамият тараққиётига хизмат қиладиган муҳим омил. Президент Шавкат Мирзиёев ҳукумат устидан жамоатчилик назоратини таъминлаш ҳамда ўз ислоҳотлар дастури ижросида эркин ва мустақил ОАВ зарурий эҳтиёж эканини қайд этган. Журналистлар ўз ишини мустақил бажара олиш имкониятига эга, таҳдидлар ва таъқиблардан ҳоли бўлиши керак», — дея таъкидланган хабарда.
Нафосат Оллошукурова 2019 йил 26 сентябрда маъмурий қамоқ жазосини ўтаётган пайтида руҳиятида ўзгаришлар сезилганлиги учун психиатрнинг тавсияси билан вилоят руҳий асаб касалликлари диспансерида кўрикдан ўтказиш учун олиб кетилган. Кейинчалик фуқаролик ишлари бўйича Урганч туманлараро судининг 30 сентябрда ҳал қилув қарорига асосан, фуқаро Нафосат Оллошукурова ғайриихтиёрий тартибда Хоразм вилоят руҳий асаб касалликлари диспансерига юборилган.
Блогернинг диспансерда экани ОАВда кенг муҳокама қилинган, жумладан, Ахборот ва оммавий коммуникациялар агентлиги раҳбари Комил Алламжонов Нафосат Оллошукурова ва Давлатназар Рўзметов билан боғлиқ воқеаларга муносабат билдириб, барча журналист ва блогерларни бирор-бир масалани оммага кўтариб чиқаётганда шошқолоқлик қилмасдан, ҳиссиётларга берилмасдан, жиддий суриштирув ва фактларга асосланиб, холис материал беришга чақирганди. 2019 йил 28 ноябрь куни фуқаролик ишлари бўйича Хоразм вилояти судининг кассация инстанцияси блогер Нафосат (Шабнам) Оллошукурова руҳий касалликлар шифохонасида даволанишни давом эттириш юзасидан қарор чиқарган. Бир ой ўтиб, 28 декабрда Оллошукурова Тошкентнинг Юнусобод туманидаги уйига қайтганди. 31 декабрда АҚШ давлат котиби Майк Помпеонинг Жанубий ва Марказий Осиё масалалари бўйича ёрдамчиси вазифасини бажарувчи Элис Уэллс Ўзбекистонда блогер Нафосат Оллошукурованинг уч ойдан ортиқ руҳий касалликлар касалхонасида ушлаб турилганидан сўнг озод қилинганини яхши янгилик сифатида эътироф этган. 20 январь, душанба куни блогернинг Ўзбекистонни тарк этгани маълум бўлди.
Изоҳ (0)