Хитойда Интерполнинг собиқ раҳбари пора олишда айбланиб, 13,5 йилга озодликдан маҳрум қилинди

Хитой суди Интерполнинг собиқ раҳбари Мен Хунвейни пора олганликда айблаб, 13,5 йилга озодликдан маҳрум қилиш жазосига ҳукм қилди, деб хабар бермоқда Хитойнинг «Женмин жибао» давлат газетасига таяниб Meduza. Шунингдек, у 2 миллион юан (290 минг доллар) жаримага тортилган.

Аввалроқ у 14,46 миллион юан (тахминан 2 миллион доллар) пора олганлигини тан олган.

Мен Хунвей Интерполга 2016 йилнинг ноябрь ойидан бошлаб 2018 йилнинг сентябрида Хитойга қўлга олингунига қадар раҳбарлик қилиб келган. У Интерпол президенти этиб сайланган Хитойнинг биринчи фуқаросидир. Унга қадар 40 йил давомида Хитойнинг жиноий ишлар бўйича адлия тизимида, хусусан, Хитой Соҳил хавфсизлиги хизмати раҳбари ва жамоат хавфсизлиги вазирининг ўринбосари лавозимларида ишлаган.

2018 йилнинг сентябрида Мен Хунвейнинг Францияда яшовчи рафиқаси эри Хитойга сафари чоғида ғойиб бўлганини маълум қилган. Унинг айтиб беришича, ғойиб бўлишидан аввал унга пичоқнинг суратини жўнатган. Аёлнинг фикрича, эри шу тариқа унга хавф остида эканлигини билдирмоқчи бўлган. Орадан бир неча кун ўтиб, Хитой Мен Хунвей коррупция иши бўйича ҳибсда эканлигини тасдиқлаган.