Йакшанбадан душанбага ўтар кечаси Ўзбекистон ҳудудидан ғарбий совуқ ҳаво оқими ўтди. Ушбу синоптик вазият натижасида республика ҳудуди бўйлаб ёмғир ва қор кузатилди. Мамлакат шимоли ва тоғли туманларда асосан қор ёғди.
«Ўзгидромет» хабарига кўра Кавказ ҳудудидан кирган антициклон республика бўйлаб аста ҳаракат қилмоқда ва бугун Ўзбекистон шимолига таъсир кўрсатмоқда.
Бугун, 20 январда кун давомида Ўзбекистон ҳудуди бўйлаб ёғингарчилик эҳтимоли сақланиб туради, фақат Фарғона водийси вилоятларида ёғингарчилик бўлмайди. Ҳарорат 0—5 даража илиқ атрофида бўлади.
21—22 январь кунлари совуқ ҳаво оқими бутун республика ҳудудини қамраб олади. Айрим жойларда ёғингарчилик (ёмғир, қор) бўлади. Тунги ҳарорат 3—5 даража совуққача, шимолий ҳудудлларда 8 даража совуққача пасаяди. Кундузи 0—5 даража илиқ бўлади.
23 январда совуқ антициклон шарққа ҳаракатланади, Ўзбекистон ҳудудининг катта қисми Туркманистон ҳудудидан кирган нам ҳаво оқимлари таъсирида бўлади. Республика бўйлаб об-ҳавонинг очиқ ва қуёшли бўлиши кутилмоқда. Кундузги ҳарорат 7—9 даража илиққача кўтарилади. Тунги ҳарорат эса юқорида кўрсатилгандек сақланиб туради.
24—25 январда ғарбий антициклон кириши кутилмоқда. Илиқ жанубий оқимларнинг сақланиб туриши ҳисобига мамлакат ҳудуди бўйлаб ёмғир ёғади. Тоғли туманларда ёғингарчилик (қор, ёмғир) бўлади. Шу кунларда ҳаво ҳарорати кечаси 2 даража совуқ — 3 даража илиқ, кундузи 2—7 даража илиқ бўлади, бу кўрсаткичлар йилнинг шу даври учун хос бўлган меъёрларга яқиндир.
Изоҳ (0)