Президент депутатнинг кундалик ишини кузатиш мумкин бўлган электрон портал ва мобил иловаларни ишга туширишни таклиф қилди

Президент Шавкат Мирзиёев парламент ва депутат сўровининг таъсирчанлигини ошириш зарурлигини таъкидлади. Бу ҳақда «Дарё» мухбири Миролим Исажонов хабар бермоқда.

«Афсуски, айрим ҳолларда депутат сўровига раҳбарнинг ўзи эмас, балки унинг ўринбосари ҳатто бошқарма бошлиқлари жавоб қайтармоқда. Ўзингиз айтинг, қани бу масалада халқ вакилининг обрўси? Парламентга ва депутатга бўлган ҳурмат шуми? Бундай салбий ҳолатларга мутлақо йўл қўйиб бўлмайди», — деди давлат раҳбари.

Президент парламент ва депутат сўровига вазирлик ва идоралар биринчи раҳбарларининг шахсан ўзлари жавоб бериши шартлигини қонунда белгилашни таклиф қилди.

«Халқ билан мулоқот тизимини мутлақо янги босқичга олиб чиқиб, депутатларни ўз сайловчилари билан боғлаш имкониятини берадиган электрон портал ва мобил иловаларни ишга тушириш лозим. Токи ана шу тизим орқали сайловчи депутатнинг кундалик ишини кузатиб бориш, қонун лойиҳаларини муҳокама қилиш ва улар бўйича ўз фикр ва мулоҳазаларини билдириш имконига эга бўлсин. Яъни депутат фаолиятига унинг сайловчилари бевосита баҳо берсин. Ана шундагина фуқаро ва парламент ўртасида халқимиз биздан кутаётган ҳақиқий кўприк пайдо бўлади», — деди Шавкат Мирзиёев.

Унинг таъкидлашича, «Менинг фикрим» веб-портали ишини такомиллаштириш, унга тушаётган мурожаатларни телевидение ва бошқа оммавий ахборот воситаларида депутатлар, мутахассислар, кенг жамоатчилик иштирокида муҳокама қилиш мақсадга мувофиқ.

Шунингдек, депутатлар ўзининг юриш-туриши, муомала маданияти, одоби ва этикаси билан барчага ибрат ва намуна бўлиши лозимлигини таъкидлади. У Давлат бошқаруви академияси билан биргаликда депутатларнинг малакасини доимий ошириб бориш юзасидан янгича тизим — депутатлик ўқувларини жорий этишни таклиф қилди.

Шавкат Мирзиёев ўз нутқининг якунида халқ ишончи ҳақида гапирди.

«Ана шундай ишонч, ҳурмат ва эътиборга муносиб бўлиш бу — жуда катта бахт. Бағрикенг, меҳнаткаш ва олийжаноб халқимизнинг ана шу ишончини ҳар биримиз ўз жойимизда амалий ишлар билан оқлашимиз керак. Бу бизнинг нафақат фуқаролик, балки, энг аввало, она Ватанимиз олдидаги фарзандлик бурчимиздир», — деди Президент.