Умумий фойдаланишдаги автомобиль йўлларининг йўл бўйи минтақаларидаги ер участкалари ва иншоотларида ташқи реклама объектларини (конструкциялари) жойлаштириш, қуриш ва эксплуатация қилиш, ушбу участкалардаги объектларнинг жойлашувини келишиш ҳамда умумий фойдаланишдаги автомобиль йўлларидан фойдаланиш тартиблари тасдиқланади.
Бу ҳақда Вазирлар Маҳкамасининг тегишли қарори лойиҳаси Норматив-ҳуқуқий ҳужжатлар лойиҳалари муҳокамаси порталида эълон қилинди. Унда асосий тушунчалар, умумий қоидалар, ер участкалари ва иншоотларда ташқи реклама объектларини жойлаштиришга қўйиладиган талаблар, уларни жойлаштириш тартиби, тўловлари, реклама берувчи (тарқатувчи)нинг ҳуқуқ ва мажбуриятлари баён этилган.
Қарор лойиҳасига кўра умумий фойдаланишдаги автомобиль йўллари давлат мулки бўлиб, автомобиль йўлларидан фойдаланувчилар учун очиқдир. Умумий фойдаланишдаги автомобиль йўллари аҳоли эҳтиёжларини, давлатнинг ижтимоий-иқтисодий ва мудофаа эҳтиёжларини қаноатлантириш учун шаҳарлар ҳамда бошқа аҳоли пунктлари ўртасида юклар ва йўловчилар ташишни таъминлайди.
Умумий фойдаланишдаги автомобиль йўлларининг йўл бўйи минтақаларидаги ер участкалари ва иншоотларида ташқи реклама объектларини (конструкциялари) жойлаштирилиши устидан назорат қилиш Транспорт вазирлиги ҳузуридаги Автомобиль йўллари қўмитаси томонидан амалга оширилади.
Реклама берувчилар (тарқатувчилар) билан қўмита ўртасидаги алоқани амалга ошириш, ташқи реклама объектларини жойлаштириш учун Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари, давлат ва нодавлат ташкилотларининг таклифлари, шунингдек, юридик ва жисмоний шахсларнинг мурожаатлари асосида ташқи реклама объектларини (конструксиялари) қурилиши учун берилган ер участкалари ва иншоотларнинг турлари, асосий дизайн ечимлари ва реклама тузилмаларининг ўлчамлари, уларнинг жойлашиш хариталарини (схемалари) рўйхатини тузиш, улардан тўлов ҳақларини жамлаш ва белгиланган тартибда тақсимлаш, ташқи рекламани жойлаштириш тартибига риоя этилиши устидан мониторингни ташкил этиш қўмита таркибидаги «Автойўлсервис» УК томонидан мазкур тартиб асосида амалга оширилади.
Қарор лойиҳаси муҳокамаси 29 январгача давом этади.
Изоҳ (0)