Yаkshanbadan dushanbaga o‘tar kechasi O‘zbekiston hududidan g‘arbiy sovuq havo oqimi o‘tdi. Ushbu sinoptik vaziyat natijasida respublika hududi bo‘ylab yomg‘ir va qor kuzatildi. Mamlakat shimoli va tog‘li tumanlarda asosan qor yog‘di.
“O‘zgidromet” xabariga ko‘ra Kavkaz hududidan kirgan antisiklon respublika bo‘ylab asta harakat qilmoqda va bugun O‘zbekiston shimoliga ta’sir ko‘rsatmoqda.
Bugun, 20-yanvarda kun davomida O‘zbekiston hududi bo‘ylab yog‘ingarchilik ehtimoli saqlanib turadi, faqat Farg‘ona vodiysi viloyatlarida yog‘ingarchilik bo‘lmaydi. Harorat 0—5 daraja iliq atrofida bo‘ladi.
21—22 -yanvar kunlari sovuq havo oqimi butun respublika hududini qamrab oladi. Ayrim joylarda yog‘ingarchilik (yomg‘ir, qor) bo‘ladi. Tungi harorat 3—5 daraja sovuqqacha, shimoliy hududllarda 8 daraja sovuqqacha pasayadi. Kunduzi 0—5 daraja iliq bo‘ladi.
23-yanvarda sovuq antisiklon sharqqa harakatlanadi, O‘zbekiston hududining katta qismi Turkmaniston hududidan kirgan nam havo oqimlari ta’sirida bo‘ladi. Respublika bo‘ylab ob-havoning ochiq va quyoshli bo‘lishi kutilmoqda. Kunduzgi harorat 7—9 daraja iliqqacha ko‘tariladi. Tungi harorat esa yuqorida ko‘rsatilgandek saqlanib turadi.
24—25-yanvarda g‘arbiy antisiklon kirishi kutilmoqda. Iliq janubiy oqimlarning saqlanib turishi hisobiga mamlakat hududi bo‘ylab yomg‘ir yog‘adi. Tog‘li tumanlarda yog‘ingarchilik (qor, yomg‘ir) bo‘ladi. Shu kunlarda havo harorati kechasi 2 daraja sovuq — 3 daraja iliq, kunduzi 2—7 daraja iliq bo‘ladi, bu ko‘rsatkichlar yilning shu davri uchun xos bo‘lgan me’yorlarga yaqindir.
Izoh (0)