Бугун, 20 январь куни Олий Мажлис Қонунчилик палатасининг сайловдан кейинги илк мажлиси бўлиб ўтди.
Қонунчилик палатаси тарихида илк бор Спикернинг биринчи ўринбосари лавозими жорий қилиниб, унга «Миллий тикланиш» партияси аъзоси Акмал Саидов сайланди. Мажлисда қатнашаётган 150 нафар депутатдан 147 нафари салкам 20 йиллик депутатлик тажрибасига эга Акмал Саидов номзодини ёқлаб овоз берган.
«Дарё» мухбири Миролим Исажоновнинг хабар беришича, Акмал Саидов мажлисда нутқ сўзлаб, билдирилган ишонч учун Шавкат Мирзиёевга миннатдорчилик билдирди:
«Спикернинг биринчи ўринбосари лавозими янги парламентнинг юзини кўрсатадиган мансаблардан бири бўлиши керак, деб қабул қилдим. Авваламбор, ишончингиз учун депутатларга ҳам, сизга ҳам раҳмат. Мана шу йўналишда салоҳиятимни имкон борича сарфлаб, садоқат билан хизмат қилишга ҳаракат қиламан.
Бўлиб ўтган сайловлар Ўзбекистон учун, авваламбор, халқимиз олдида, жаҳон ҳамжамияти олдида катта сиёсий имтиҳон вазифасини ўтади.
Сайловлардан кейин мен кўп маълумотларни ўргандим. Европада хавфсизлик ва ҳамкорлик ташкилоти 1992 йилдан бери 50 дан ортиқ давлатларда кузатув ўтказган, мониторинг 400 дан ортиқ шундай кузатувлар бўлган. Ўзбекистонда 8 маротаба кузатувчилик қилишган. Жумладан, Президент сайловларида 3 марта, парламент сайловларида 5 марта. МДҲ мамлакатлари ичида Ўзбекистонга берилган охирги баҳо энг юқориси бўлди. Мен ҳаммасини қиёслаб чиқиб, хулоса қилдимки, Ўзбекистондаги охирги сайловлар атрофдаги кўпгина давлатлар учун, ЕХҲТ учун ҳам намуна бўладиган сайлов бўлди».
Изоҳ (0)