Техасда ҳуқуқбузар черковда отишма келтириб чиқарди. Уни ибодатхона қўриқчиси отиб ўлдирди

Номаълум эркак Техаснинг Уайт-Сетлмент шаҳридаги ибодатхонада отишма келтириб чиқарди. Бу ҳақда маҳаллий полицияга асосланиб, CNN хабар бермоқда.

Қуролланган шахс тахминан 250 киши қатнашаётган якшанбалик ибодат вақтида ўт очган. The New York Times’нинг ёзишича, ибодат маросими интернет орқали жонли эфирда трансляция қилинаётган эди.

Эркак қаторларнинг биридан туриб бир неча бор ўқ узган. Черковни қўриқлаш бўйича кўнгиллилар жамоаси аъзоси ҳисобланган тақводор томонидан отиб ташлангунига қадар у икки кишини ўлдиришга улгурган.

Ҳужум тахминан олти сония давом этган. Ўқотар нима сабабдан бундай ҳужум уюштиргани номаълум, расмийлар унинг исмини ошкор қилмаяпти.

Техас штати расмийлари 2019 йилда сентябрида қурол сақлашга расман рухсати бор шахсларга уни ибодатхоналар ҳудудига олиб киришга рухсат берган эди.

2017 йил ноябрида собиқ ҳарбий Девин Келли Техасдаги Сазерленд-Спрингс шаҳридаги черковда 26 кишини отиб ташлаган, сўнг ўзини ўзи ўлдирган эди. Бу Техас тарихидаги энг оммавий қотиллик бўлганди.