Олмаота халқаро аэропорти Bek Air самолёти ҳалокати хронологиясини эълон қилди

Олмаота халқаро аэропорти Facebook’даги расмий сайтида фавқулодда вазият содир бўлганда аниқ ва ҳамжиҳатлик билан ҳаракат қилиш зарурлигини қайд этди. Олмаота халқаро аэропорти бу каби ҳолатларда тўғри ҳаракат қилиш қоидалари ва алгоритмларига эга, дейилади постда.

Аэропортнинг ижтимоий тармоқдаги саҳифасида авиаҳалокатдан кейин амалга оширилган ҳаракатлар хронологияси келтирилган.

05:35 – рўйхатга олиш бошланган;06:35 – рўйхатга олиш якунланган;07:03 – самолётга чиқиш якунланган;07:21 – учиш;07:22 – борт радарлардан йўқолиб қолган;07:24 – учишлар раҳбари аэропорт авария-қутқарув жамоаси шахсий таркиби учун фавқулодда вазият бўйича сафарбарлик эълон қилган (ушбу жамоа таркибига Қидирув, авария-қатқарув хизмати, тиббий хизмат, йўловчилар парвозларини ташкиллаштириш хизмати, Махсус транспорт, Аэродром хизматлари, Авариявий хавфсизлик хизмати, юк ўтказмалари хизмати, Авиацион-муҳандислик хизмати киради);07:27 – аэропортнинг авария-қутқарув жамоаси 6 «К» квадратдан жамланди;07:35 – учишлар раҳбари 20 «А» квадратда авиаҳалокат содир бўлгани ҳақида маълумот олди;07:36 – авиаҳалокат содир бўлган жойга биринчи аэропортнинг ўт ўчириш ва қутқарув гуруҳи етиб келган ва 18 «В» квадратда ҳалокат юз берганини хабар қилиб, йўловчилар эвакуациясини бошлаган;07:38 – воқеа жойига аэропортнинг аэропортнинг ўт ўчириш ва қутқарув гуруҳи тўлиқ таркибда етиб келган ва йўловчилар эвакуациясини бошлаган;07:39 – аэропортнинг авария-қутқарув жамоаси бошлиғи Олмаота тиббиёт муассасаларидан қўшимча ёрдам кучлари сўраган;07:42 – аэропорт авария-қутқарув жамоасининг тўлиқ таркиби воқеа жойига етиб келган;08:10 – мустақил ҳаракатлана оладиган барча йўловчилар фавқулодда вазият юз берган жойдан терминалга эвакуация қилинган.

Дастлабки дақиқаларда авиаҳалокат юз берган жойга 22 та махсус техника, аэропорт шахсий таркибининг 83 нафар аъзоси етиб келган.

Bek Air авиакомпаниясининг самолёти 27 декабрь куни Қозоғистон маҳаллий вақти билан тонгги соат 7 да ҳалокатга учраган. Лайнер бортида беш нафар экипаж аъзоси, 93 нафар йўловчи, жумладан, 89 нафар Қозоғистон фуқаролари, икки нафар Украина, бир нафар Қирғизистон ва бир нафар Хитой фуқароси бўлган. Ўзбекистон ташқи ишлар вазирлиги ҳалок бўлганлар орасида ўзбекистонликлар йўқлигини билдирган. Авиаҳалокат оқибатида 15 нафар одам, хусусан, самолёт командири ҳалок бўлди. Расмий манбалар авиаҳалокат қурбонлари сонининг 12 нафар эканини маълум қилган. Олмаотадаги турли тиббиёт муассасаларига жами 49 нафар одам ётқизилган. Шавкат Мирзиёев Олмаотадаги авиаҳалокат муносабати билан Қозоғистон президентига таъзия билдирган.  Авиаҳалокатга учраган Bek Air самолёти қурбонларининг оилаларига 4 миллион тангадан маблағ ажратилган.