Қозоғистон ички ишлар вазири Ерлан Тургумбаев Bek Air самолётининг фалокатга учрашига сабаб бўлган версиялар ўрганилаётганини маълум қилди, деб хабар беради Tengrinews.
«Ҳозирда ИИВ тергов гуруҳи Олмаотада содир бўлган авиаҳалокат бўйича суриштирув ишларини олиб бормоқда. Айни вақтда учта версия кўриб чиқиляпти. Биринчиси, экипажнинг хатоси. Иккинчиси, бортнинг техник носоз бўлганлиги. Учинчиси, навигация хизматининг иши», — дейди ИИВ раҳбари.
Таъкидланишича, ҳозирда воқеа жойини кўздан кечириш ва ҳаво лайнерини демонтаж қилиш ишлари олиб борилмоқда. Шундан сўнг самолёт аэропорт ҳудудига олиб борилиб, у ерда батафсил текширувдан ўтказилади.
Bek Air авиакомпаниясининг самолёти 27 декабрь куни Қозоғистон маҳаллий вақти билан тонгги соат 7 да ҳалокатга учраган. Лайнер бортида беш нафар экипаж аъзоси, 93 нафар йўловчи, жумладан, 89 нафар Қозоғистон фуқаролари, икки нафар Украина, бир нафар Қирғизистон ва бир нафар Хитой фуқароси бўлган. Ўзбекистон ташқи ишлар вазирлиги ҳалок бўлганлар орасида ўзбекистонликлар йўқлигини билдирган. Авиаҳалокат оқибатида 15 нафар одам, хусусан, самолёт командири ҳалок бўлди. Расмий манбалар авиаҳалокат қурбонлари сонининг 12 нафар эканини маълум қилган. Олмаотадаги турли тиббиёт муассасаларига жами 49 нафар одам ётқизилган. Шавкат Мирзиёев Олмаотадаги авиаҳалокат муносабати билан Қозоғистон президентига таъзия билдирган.
Изоҳ (0)