Тожикистонлик меҳнат муҳожирлари 2019 йилда Россиядан ўз юртига 3 миллиард долларга яқин пул юборди. Бу ҳақда Россиянинг Тожикистондаги элчиси Игор Лякин-Фроловга таяниб, Sputnik хабар берди.
Элчининг сўзларига кўра, бир миллионга яқин тожикистонлик доимий равишда Россияда меҳнат қилади, 2019 йилда эса ўтказилган маблағ 3 миллиард долларга етган.
2018 йилда ушбу кўрсаткич 2,5 миллиард доллар пул ўтказмалари амалга оширилган эди. 2019 йилда Тожикистоннинг давлат бюджети 2,5 миллард долларни ташкил этган, яъни муҳожирлардан келадиган маблағ мамлакат бюджетидан кўпроқ.
«Мазкур ўтказмалар Тожикистон иқтисодиёти учун ижобий рол ўйнайди. Бизнинг мамлакатларимиз миграция соҳасидаги ўзаро муносабатларимиз узоқ ва фойдали бўлишидан манфаатдор», — дейди Лякин-Фролов.
Тожикистон ҳукуматининг ҳисоб-китобларига кўра, мамлакатда иқтисодий ўсиш кузатилмоқда. Савдо ва иқтисодий ривожланиш вазирлиги 2019 йил якуни бўйича мамлакатда ЯИМнинг реал ўсиши 7,6 миллиард долларга етаётганини маълум қилди.
Изоҳ (0)