АҚШ Жанубий Корея билан ҳарбий харажатларни тақсимлаш бўйича музокаралардаги позициясини қайта кўриб чиқиб, унинг тўлов ҳиссасини 5 баравар ошириш талабидан воз кечди. Бу ҳақда «ТАСС» хабар бермоқда.
Томонлар ўз позицияларини яқинлаштира бошлади ва Жанубий Корея учун мамлакатда АҚШ қўшинларини сақлаш учун сарфланадиган тўловлар миқдорини бироз ошириш масаласи кўриб чиқилмоқда. Икки мамлакат ўртасидаги якуний келишув 2020 йил февраль ойида тузилиши мумкин.
Хабарда айтилишича, Америка томон тўловларни қарийб 5 миллиард долларгача ошириш талаби ҳаддан ортиқ деган қарорга келди ва энди уларни фақат 10-20 фоизга ошириш, шунингдек, Жанубий Корея томонидан АҚШ қуролларини сотиб олиш борасида гап кетмоқда.
АҚШ ҳокимияти тепасига Дональд Трамп келганидан буён Вашингтон Сеулдан Корея Республикасидаги америкалик ҳарбийларни сақлаш учун тўланадиган бадални оширишни талаб қила бошлаган.
Жумладан, Жанубий Кореяга 2019 йилда ҳамкорликдаги мудофаа учун сарфланадиган харажатлар 8,2 фоизга оширилиб, 915 миллион долларни ташкил этган. Ноябрь ойида эса Вашингтон бу маблағларни деяли 5 баравар — 4,7 миллиард долларгача оширишни талаб қилган.
Томонлар бир неча босқичда музокаралар ўтказган, лекин улар ҳеч қандай келишувсиз якунланган.
Изоҳ (0)