Аэропортнинг Facebook’даги саҳифасида қолдирилган хабарга кўра, лайнер ҳавога кўтарилиш вақтида баландликни йўқотиб, бетон тўсиқни бузиб ўтган ва икки қаватли иморатга бориб урилган. Қозоғистон ИИВнинг Фавқулодда вазиятлар бўйича қўмитасидан қўшимча қилишларича, ҳодиса турар жой секторида юз берган. Қулаш оқибатида портлаш ва ёнғин кузатилмаган.
Fokker-100 самолёти Z2100 рейси бўйича Олмаотадан Нурсултон (Остона)га учаётган эди. Самолёт бортида 95 йўловчи ва экипажнинг беш нафар аъзоси бўлган.
Қозоғистон ички ишлар вазирлиги ҳодиса оқибатида 12 киши ҳалок бўлгани ҳақида баёнот берган. Яна 49 киши турли тан жароҳатлари билан касалхонага ётқизилган, улардан 18 нафарининг аҳволи оғир. Аввалроқ Қозоғистон ИИВ 15 киши ҳалок бўлгани ва 66 нафари тан жароҳати олгани ҳақида хабар берган эди, кейинроқ ушбу маълумотларга аниқлик киритилди.
Ҳалок бўлганлар орасида Қозоғистон генераллар кенгаши раиси Рустам Ҳайдаров, «Информбуро.кз» нашри муҳаррири Дана Круглова, шунингдек, самолёт капитани Марат Муратабоев ҳам бор. Ўзбекистон Ташқи ишлар вазирлигидан маълум қилишларича, авиаҳалокат оқибатида ҳалок бўлганлар ва тан жароҳати олганлар орасида Ўзбекистон фуқаролари йўқ.
Қозоғистон президенти Қосим-Жўмарт Тўқаев самолёт авариясида ҳалок бўлганларнинг оила аъзоларига ҳамдардлик билдирди ва 28 декабрни мамлакатда умуммиллий мотам куни деб эълон қилди.
Қозоғистон бош вазири ўринбосари Роман Склярнинг маълум қилишича, авиаҳалокатнинг дастлабки тахминий сабаби — техник носозлик ва учувчиларнинг хатоси. Мамлакатдаги шу турдаги барча самолётларнинг парвози вақтинча тўхтатилган. Bek Air авиакомпаниясининг фаолияти ҳам тўхтатилган.
Bek Air авиакомпаниясига 1999 йилда асос солинган бўлиб, у ички ва бир қатор халқаро (МДҲ мамлакатлари, Туркия, БАА, Мўғулистон ва Хитойга) рейсларни амалга оширувчи Қозоғистондаги илк лоукостер ҳисобланади. Авиакомпания парки еттита Fokker-100 самолётларидан ташкил топган. Flightradar24 маълумотларига кўра, ҳалокатга учраган самолёт 23 йилдан бери фойдаланувда бўлган.
Flight #Z92100 was performed by a 23 years old Fokker 100. Last photo of this aircraft in @JetPhotos database was taken in June 2018 and it looks like the aircraft has been repainted since that.https://t.co/bhxdjUUVmYhttps://t.co/cC53Jx8HQu pic.twitter.com/HLviY6bMOl
— Flightradar24 (@flightradar24) December 27, 2019
Fokker самолётлари Нидерландиянинг шу номли компанияси томонидан ишлаб чиқарилган. Fokker-100 моделидаги самолётларни ишлаб чиқариш 1997 йили, Fokker компания банкрот бўлгач тўхтатилган. Ўзбекистонда бундай моделдаги самолётлардан фойдаланилмайди.
Изоҳ (0)