Aeroportning Facebook’dagi sahifasida qoldirilgan xabarga ko‘ra, layner havoga ko‘tarilish vaqtida balandlikni yo‘qotib, beton to‘siqni buzib o‘tgan va ikki qavatli imoratga borib urilgan. Qozog‘iston IIVning Favqulodda vaziyatlar bo‘yicha qo‘mitasidan qo‘shimcha qilishlaricha, hodisa turar joy sektorida yuz bergan. Qulash oqibatida portlash va yong‘in kuzatilmagan.
Fokker-100 samolyoti Z2100 reysi bo‘yicha Olmaotadan Nursulton (Ostona)ga uchayotgan edi. Samolyot bortida 95 yo‘lovchi va ekipajning besh nafar a’zosi bo‘lgan.
Qozog‘iston ichki ishlar vazirligi hodisa oqibatida 12 kishi halok bo‘lgani haqida bayonot bergan. Yana 49 kishi turli tan jarohatlari bilan kasalxonaga yotqizilgan, ulardan 18 nafarining ahvoli og‘ir. Avvalroq Qozog‘iston IIV 15 kishi halok bo‘lgani va 66 nafari tan jarohati olgani haqida xabar bergan edi, keyinroq ushbu ma’lumotlarga aniqlik kiritildi.
Halok bo‘lganlar orasida Qozog‘iston generallar kengashi raisi Rustam Haydarov, “Informburo.kz” nashri muharriri Dana Kruglova, shuningdek, samolyot kapitani Marat Murataboyev ham bor. O‘zbekiston Tashqi ishlar vazirligidan ma’lum qilishlaricha, aviahalokat oqibatida halok bo‘lganlar va tan jarohati olganlar orasida O‘zbekiston fuqarolari yo‘q.
Qozog‘iston prezidenti Qosim-Jo‘mart To‘qayev samolyot avariyasida halok bo‘lganlarning oila a’zolariga hamdardlik bildirdi va 28-dekabrni mamlakatda umummilliy motam kuni deb e’lon qildi.
Qozog‘iston bosh vaziri o‘rinbosari Roman Sklyarning ma’lum qilishicha, aviahalokatning dastlabki taxminiy sababi — texnik nosozlik va uchuvchilarning xatosi. Mamlakatdagi shu turdagi barcha samolyotlarning parvozi vaqtincha to‘xtatilgan. Bek Air aviakompaniyasining faoliyati ham to‘xtatilgan.
Bek Air aviakompaniyasiga 1999-yilda asos solingan bo‘lib, u ichki va bir qator xalqaro (MDH mamlakatlari, Turkiya, BAA, Mo‘g‘uliston va Xitoyga) reyslarni amalga oshiruvchi Qozog‘istondagi ilk loukoster hisoblanadi. Aviakompaniya parki yettita Fokker-100 samolyotlaridan tashkil topgan. Flightradar24 ma’lumotlariga ko‘ra, halokatga uchragan samolyot 23 yildan beri foydalanuvda bo‘lgan.
Flight #Z92100 was performed by a 23 years old Fokker 100. Last photo of this aircraft in @JetPhotos database was taken in June 2018 and it looks like the aircraft has been repainted since that.https://t.co/bhxdjUUVmYhttps://t.co/cC53Jx8HQu pic.twitter.com/HLviY6bMOl
— Flightradar24 (@flightradar24) December 27, 2019
Fokker samolyotlari Niderlandiyaning shu nomli kompaniyasi tomonidan ishlab chiqarilgan. Fokker-100 modelidagi samolyotlarni ishlab chiqarish 1997-yili, Fokker kompaniya bankrot bo‘lgach to‘xtatilgan. O‘zbekistonda bunday modeldagi samolyotlardan foydalanilmaydi.
Izoh (0)