Сирдарё вилояти Янгиер шаҳрида Президент ташаббуси билан Ўзбекистон касаба уюшмалари Федерациясига қарашли «Янгиер» санаторийсининг тантанали очилиш маросими бўлиб ўтди. Бу ҳақда Соғлиқни сақлаш вазирлиги хабар берди.
Унда Ўзбекистон Президенти маслаҳатчиси Абдужаббор Абдувоҳидов, Ўзбекистон касаба уюшмалари Федерацияси раиси Қудратилла Рафиқов, Соғлиқни сақлаш вазири Алишер Шодмонов, Сирдарё вилояти ҳокими Ғофур Мирзаев, шунингдек, ҳамкор ташкилот ва идоралар вакиллари иштирок этди.
Тадбирга ташриф буюрган меҳмонлар санаторийда яратилган шарт-шароитлар билан яқиндан танишди.
Бу ерда бир вақтнинг ўзида 250 киши дам олиши ва саломатлигини тиклаши мумкин. Санаторийдаги ёдобромли минерал сув юрак-қон томир, марказий ва периферик нерв тизими, тери касалликлари, серебрал атеросклероз, таянч-ҳаракат тизимининг яллиғланиши ва жароҳатдан кейинги оқибатлар, рейно хасталиги, аёллар бепуштлигининг эндокрин шакллари, экзоген-конституцион семириш каби касалликларни даволашда самарали таъсир кўрсатади.
Санаторийни қуриш ва уни замонавий тиббий диагностика жиҳозлари билан таъминлашга Ўзбекистон касаба уюшмалари ҳисобидан жами 84 миллиард сўм маблағ сарфланди. Сиҳатгоҳда 80 та янги иш ўрни яратилди ва тез фурсатда муассасада 110 нафар ишчи ходим фаолият юритади.
Изоҳ (0)