Олий Мажлис Қонунчилик палатаси ва Халқ депутатлари кенгашларига депутатлик сайловининг дастлабки натижалари бўйича хулосаларга бағишлаб Халқаро пресс клубнинг навбатдаги кўрсатуви суратга олиниши жараёнида «Миллий тикланиш» ва Халқ демократик партияси раислари ўртасида баҳс юзага келган. Бу ҳақда ЎзА хабар берди.
Халқ демократик партияси томонидан маълум қилинишича, бошловчи Ғулом Самадов мамлакатдадаги кўплаб мактабларда ошхона, спорт заллар йўқлиги масаласини кўтарган.
ХДПнинг таъкидлашича, «Миллий тикланиш» партияси раҳбари Алишер Қодиров эса мактабларда спорт заллари ва ошхоналар йўқлигида собиқ халқ таълими вазири ва амалдаги вазирни айблашга уринган.
Бунга жавобан Халқ демократик партияси раиси Улуғбек Иноятов мактабларда ошхона ва спорт заллар қурилиши мактаб директорлари, ўқитувчиларнинг бевосита зиммасидаги вазифа эмаслигини айтган. Улуғбек Иноятов бунинг учун аввало давлат бюджетидан маблағ ажратилиши кераклиги, мактаб директорлари ва ўқитувчилар асосан ўқувчиларнинг таълим-тарбиясига масъул экани, уларга хўжалик ходими сифатида қараш, айбдор қилиш нотўғрилигини таъкидлаган.
ХДПнинг қайд этишича, Халқаро пресс клуб бошловчиси Халқ таълими вазирлигини «Миллий тикланиш» партияси тасарруфига олиши кераклиги ҳақида асосланмаган фикр билдирган.
«Шу ўринда таъкидлаш керакки, Халқаро пресс клуб продюсери Ғулом Самадов журналистиканинг холислик тамойилига амал қилмагани, арзон тортишувлар юзага келтириш орқали ном чиқаришга ишқибозлиги яна бир бор сезилиб қолди», — дейилади ХДП хабарида.
Қайд этилишича, «Адолат» СДП раҳбари Наримон Умаров ҳам бошловчи жараённи адолат билан бошқармаганини таъкидлаган.
«Эслаш жоиз, Халқаро пресс клуб продюсери Ғулом Самадовнинг нохолислиги биринчи марта кузатилаётган ҳолат эмас. Куни-кеча сайловнинг дастлабки натижалари бўйича Ўзбекистон Республикаси Бош прокурори матбуот анжумани ўтказаётган пайтда бюллетенларни санаш жараёнидаги адолатсизлик ва қонунбузилишлар ҳақида савол берган номзод ва блогерга Ғ.Самадов ўзича дакки бермоқчи бўлгани ижтимоий тармоқларда катта муҳокамаларга сабаб бўлди», — дейилади ХДП хабарида.
Эслатиб ўтамиз, амалдаги халқ таълими вазири Шерзод Шерматов 2018 йилда мазкур лавозимга тайинлангунига қадар, Ўзбекистон ХДПнинг амалдаги раиси Улуғбек Иноятов 2013—2018 йилларда халқ таълими вазири лавозимида фаолият юритган.
Изоҳ (0)