Ynet интернет нашри туризм мавзусидаги сўровнома натижасини эълон қилди. Сўровнома туризм соҳасидаги келаси 10 йиллик тенденцияларини аниқлаш учун 25 нафар профессионал саёҳатчи-блогер ўртасида ташкил этилди. Бу ҳақда Туризмни ривожлантириш давлат қўмитаси хабар берди.
Ўзбекистон ҳақидаги материаллар Туризмни ривожлантириш давлат қўмитаси томонидан ташкил этилган инфо-турда иштирок этган блогер Янина Злаславский Афекнинг фото ва мақоласи асосида тайёрланди. Бу каби кўплаб соҳалар орқали Исроилдаги реклама-тарғибот ишлари қисқа муддатда ўз натижасини кўрсатди, дейилади қўмита хабарида.
2017 йилда 3800 нафар Исроил фуқароси Ўзбекистонга ташриф буюрган бўлса, 2018 йилда бу кўрсатгич 9779 кишини ташкил этди, 2019 йилда эса 13170 нафар исроиллик Ўзбекистонга келди.
«Илгари Буюк Ипак йўлининг юраги бўлган ва бугунги кунда минтақадаги энг тез ривожланаётган давлатлардан бири бўлган, Марказий Осиё саҳролари ўртасида жойлашган ўлкага ташриф буюриш вақти келди. Қулай сайёҳлик инфратузилмаси сайёҳларга қадимий тарих, либерал Ислом, қадимий яҳудий обидалари, бетакрор меъморчилик ҳамда Шарқ ва Ғарб таъсири остида яратилган бой маданияти билан қарши олади. Куз ва баҳор мамлакатга ташриф буюриш учун энг қулай пайт», — деб ёзади нашр.
Ynet — Исроил янгиликлари ва бошқа ижтимоий мавзуларни ёритувчи интернет нашр ҳисобланади. У 2000 йилда иш бошлаган, 2008 йилдан бери Ynet нашри Google Trends статистикасига кўра Исроилдаги энг оммабоп интернет портал ҳисобланади.
Alexa интернет трафик рейтинги ҳисоботига кўра, Ynet дунёдаги энг яхши 1500 веб-сайт рўйхатига киради.
Изоҳ (0)