Наманган шаҳридаги «Шодиёна» мажмуасида ногирон, меҳнатга лаёқатсиз ва уй-жойга муҳтож фуқароларга янги уйлар калити топширилди. Бу ҳақда «Дарё» мухбири Азизбек Абдувалиев хабар бермоқда.
Улар ушбу муаммо юзасидан Президентнинг жойлардаги Халқ қабулхоналари, ҳокимликлар, хотин-қизлар қўмиталарига мурожаат этган ва мазкур масалада кўмак беришни сўраганди.
Тадбирда иштирок этган вилоят ҳокимининг ўринбосари, вилоят хотин-қизлар қўмитаси раиси Ирода Қўчқорованинг айтишича, ўтган икки йил давомида Наманганда уй-жойга муҳтож, жисмоний имконияти чекланган 343 нафар фуқаро янги хонадонлар эгасига айланди.
Бугун уларнинг сафига яна 198 киши қўшилди. Ушбу уйларнинг бошланғич тўловлари тўлаб берилган.
Шу куни «Шодиёна» мажмуасига тўпланган ҳамюртлар Янги йил арафасида энг катта совғага эга бўлганликларини таъкидлашди. Улар орасида Норин туманининг 18 нафар вакили ҳам бор.
—Турмуш ўртоғим вафотидан кейин икки нафар вояга етмаган фарзандим билан ёлғиз қолдим. Аризам инобатга олиниб, Полвонкўл маҳалласидан икки сотих, 3 хонали намунали уй ажратиб берилди. 22 миллион сўмдан ошиқ дастлабки тўлови ҳам тўлаб берилди. Бунга бош қўшиб, мушкулимизни осон қилганларни ҳар қанча дуо қилсак оз, — дейди норинлик Муҳаббат Мамаюсупова.
Чуст туманида эса «Садача» маҳалласи Гулзор даҳасидаги янги қурилган уй-жойлардан 15 таси эҳтиёжманд оилаларга топширилди.
Изоҳ (0)