Ўзбекистон Республикаси транспорт вазирлиги веб-сайтининг интерактив хизматлар бўлимида ҳаракатлар жадвали рукни орқали Ислом Каримов номидаги Тошкент халқаро аэропорти ва Самарқанд халқаро аэропортлари парвозлар жадвалини реал вақт режимида кузатиб бориш имконияти яратилди. Бу ҳақда Ўзбекистон Республикаси транспорт вазирлиги ахборот хизмати хабар берган.
Ушбу интерактив хизмат орқали юқоридаги иккита аэропортнинг халқаро ва маҳаллий йўналишлардаги авиақатновлари тўғрисида батафсил маълумот олиш мумкин. Яқин вақт орасида қолган барча халқаро аэропортлар парвозлар жадвалини ҳам кузатиб бориш имконияти яратилиши кутилмоқда.
Йўловчилар «Тошкент» автовокзалидан амалга оширилаётган шаҳарлараро ва халқаро йўналишлардаги автобус қатновлари тўғрисида ҳам маълумот олиши мумкин. Электрон билетлар бўлимида «Тошкент» автовокзалидан ҳаракатланаётган шаҳарлараро маҳаллий йўналишлардаги автобус қатновларига чипталарни онлайн харид қилиш хизмати мавжуд. Ҳозирда мамлакатимизнинг барча ҳудудларидан чипталарни онлайн сотиб олиш имкониятини тақдим этиш бўйича ишлар олиб борилмоқда.
Бундан ташқари ушбу бўлимда «Ўзбекистон темир йўллари» АЖ нинг маҳаллий ва халқаро йўналишлардаги поездлар ҳаракат жадвалини кузаца бўлади.
Автотранспортда халқаро юк ташувлари билан шуғулланувчиларга қулайлик яратиш мақсадида хорижий/кўп томонлама рухсатномаларга миллий ташувчилардан буюртмаларни онлайн тарзда қабул қилиш тизими йўлга қўйилди. Халқаро йўналишда юк ташиш учун лицензияга эга бўлган ташувчилар Ўзбекистоннинг исталган ҳудудидан, ўзи учун қулай бўлган вақтда аризаларни электрон тарзда жўната олади.
2020 йилнинг январь ойидан автомобиль транспортида йўловчиларни ҳамда юкларни шаҳарда, шаҳар атрофида, шаҳарлараро ва халқаро йўналишлар бўйича ташиш фаолиятини амалга ошриш учун лицензия ва лицензия карточкаларини электрон шаклда расмийлаштириш тизими ишга тушади.
Изоҳ (0)