Namangan shahridagi “Shodiyona” majmuasida nogiron, mehnatga layoqatsiz va uy-joyga muhtoj fuqarolarga yangi uylar kaliti topshirildi. Bu haqda “Daryo” muxbiri Azizbek Abduvaliyev xabar bermoqda.
Ular ushbu muammo yuzasidan Prezidentning joylardagi Xalq qabulxonalari, hokimliklar, xotin-qizlar qo‘mitalariga murojaat etgan va mazkur masalada ko‘mak berishni so‘ragandi.
Tadbirda ishtirok etgan viloyat hokimining o‘rinbosari, viloyat xotin-qizlar qo‘mitasi raisi Iroda Qo‘chqorovaning aytishicha, o‘tgan ikki yil davomida Namanganda uy-joyga muhtoj, jismoniy imkoniyati cheklangan 343 nafar fuqaro yangi xonadonlar egasiga aylandi.
Bugun ularning safiga yana 198 kishi qo‘shildi. Ushbu uylarning boshlang‘ich to‘lovlari to‘lab berilgan.
Shu kuni “Shodiyona” majmuasiga to‘plangan hamyurtlar Yangi yil arafasida eng katta sovg‘aga ega bo‘lganliklarini ta’kidlashdi. Ular orasida Norin tumanining 18 nafar vakili ham bor.
—Turmush o‘rtog‘im vafotidan keyin ikki nafar voyaga yetmagan farzandim bilan yolg‘iz qoldim. Arizam inobatga olinib, Polvonko‘l mahallasidan ikki sotix, 3 xonali namunali uy ajratib berildi. 22 million so‘mdan oshiq dastlabki to‘lovi ham to‘lab berildi. Bunga bosh qo‘shib, mushkulimizni oson qilganlarni har qancha duo qilsak oz, — deydi norinlik Muhabbat Mamayusupova.
Chust tumanida esa “Sadacha” mahallasi Gulzor dahasidagi yangi qurilgan uy-joylardan 15 tasi ehtiyojmand oilalarga topshirildi.
Izoh (0)