Ўзбекистонда 2017—2019 йиллар давомида овқатдан заҳарланиш билан боғлиқ 154 та ҳолатда 15 нафар фуқаро вафот этган. Бу ҳақда Ўзбекистон Сенати Кенгашининг 24 декабрь куни бўлиб ўтган кенгайтирилган йиғилишида сенатор Зайниддин Низомхўжаев маълум қилди.
«Дарё» мухбири Мусулмонбек Иброҳимовнинг хабар беришича, сенатор Низомхўжаев кун тартибига киритилган умумий овқатланиш корхоналари ва таълим тизимида аҳолининг санитария-эпидемиологик осойишталигини таъминлаш масалалари ҳақида маъруза қилган.
Мавзуга доир: Танзила Норбоева соғлиқни сақлаш вазири Алишер Шодмоновга қўштирноқ ичида «салом» йўллади
Таҳлилларга кўра, агар 2005—2016 йилларда овқатдан заҳарланиш натижасида жабрланганлар сони бир йилда ўртача 170 кишини ташкил этган бўлса, 2017—2019 йилларда бу кўрсаткич йилига 566 нафардан иборат бўлган.
Бу ҳолат асосан умумий овқатланиш корхоналари, мактабгача таълим ва умумий ўрта таълим тизимида рўй бермоқда. Жумладан, 2017—2019 йилларда ушбу объектларда 31 та овқатдан заҳарланиш ҳолати қайд этилиб, 1 330 нафар фуқаро (шундан 435 нафари болалар) жабрланган.
Бундай ҳолат тўйхона, ошхона, кафе, ресторан ва бошқа умумий овқатланиш корхоналарининг санитария талаблари лойиҳалари асосида қурилмаганлиги, маҳсулотларни тайёрлаш, сақлаш ҳамда реализация қилиш учун санитария талабларига мувофиқ шароитлар яратилмаганлиги, мактабгача таълим ташкилотлари ва мактабларда ошхоналарнинг жиҳозлар билан тўлиқ таъминланмаганлиги, мавжудлари эса маънан эскирганлиги, носозлиги, ошпаз ва ошпаз ёрдамчиларининг тиббий кўрикдан ўтмаганлиги, технологик талабларни билмаслиги, таом тайёрлашда сифати ва хавфсизлиги кафолатланмаган маҳсулотларнинг ишлатилиши оқибатида юзага келган.Зайниддин Низомхўжаев, сенатор
Изоҳ (0)