O‘zbekistonda 2017—2019-yillar davomida ovqatdan zaharlanish bilan bog‘liq 154 ta holatda 15 nafar fuqaro vafot etgan. Bu haqda O‘zbekiston Senati Kengashining 24-dekabr kuni bo‘lib o‘tgan kengaytirilgan yig‘ilishida senator Zayniddin Nizomxo‘jayev ma’lum qildi.
“Daryo” muxbiri Musulmonbek Ibrohimovning xabar berishicha, senator Nizomxo‘jayev kun tartibiga kiritilgan umumiy ovqatlanish korxonalari va ta’lim tizimida aholining sanitariya-epidemiologik osoyishtaligini ta’minlash masalalari haqida ma’ruza qilgan.
Mavzuga doir: Tanzila Norboyeva sog‘liqni saqlash vaziri Alisher Shodmonovga qo‘shtirnoq ichida “salom” yo‘lladi
Tahlillarga ko‘ra, agar 2005—2016-yillarda ovqatdan zaharlanish natijasida jabrlanganlar soni bir yilda o‘rtacha 170 kishini tashkil etgan bo‘lsa, 2017—2019 yillarda bu ko‘rsatkich yiliga 566 nafardan iborat bo‘lgan.
Bu holat asosan umumiy ovqatlanish korxonalari, maktabgacha ta’lim va umumiy o‘rta ta’lim tizimida ro‘y bermoqda. Jumladan, 2017—2019 yillarda ushbu obyektlarda 31 ta ovqatdan zaharlanish holati qayd etilib, 1 330 nafar fuqaro (shundan 435 nafari bolalar) jabrlangan.
Bunday holat to‘yxona, oshxona, kafe, restoran va boshqa umumiy ovqatlanish korxonalarining sanitariya talablari loyihalari asosida qurilmaganligi, mahsulotlarni tayyorlash, saqlash hamda realizatsiya qilish uchun sanitariya talablariga muvofiq sharoitlar yaratilmaganligi, maktabgacha ta’lim tashkilotlari va maktablarda oshxonalarning jihozlar bilan to‘liq ta’minlanmaganligi, mavjudlari esa ma’nan eskirganligi, nosozligi, oshpaz va oshpaz yordamchilarining tibbiy ko‘rikdan o‘tmaganligi, texnologik talablarni bilmasligi, taom tayyorlashda sifati va xavfsizligi kafolatlanmagan mahsulotlarning ishlatilishi oqibatida yuzaga kelgan.Zayniddin Nizomxo‘jayev, senator
Izoh (0)