Ўзбекистонда олийгоҳларга кириш учун топшириладиган тест синови фанлар мажмуаси, топшириқлар сони ҳамда уларни баҳолаш мезонлари тасдиқланди

Ўзбекистон таълим муассасаларига ўқишга қабул қилиш бўйича Давлат комиссиясининг 20 декабрдаги 11-сон баёни билан 2020/2021 ўқув йили қабулидан республика олий таълим муассасаларининг бакалавриат таълим йўналишларига мос тест синови топшириладиган фанлар мажмуаси, тест топшириқлари сони ҳамда баҳолаш мезонлари тасдиқланди.

Олий ва ўрта махсус таълим вазирлигидан хабар беришларича, 2020/2021 ўқув йили қабулидан тест синови топшириладиган фанлар мажмуаси икки бўлимга ажратилади:

• Биринчи бўлимга барча тест топширувчилар учун мажбурий учта фан — она тили (ўзбек, рус ёки қорақалпоқ тили), математика ва Ўзбекистон тарихи фанлари киритилади. Мазкур учала фандан 15 тадан жами 45 та тест топшириғи берилади. Ҳар бир тўғри жавобга 2,1 балл берилади, максимал балл — 94,5 балл.
• Иккинчи бўлимга абитуриент танлаган бакалавриат таълим йўналишларига мос иккита фан киритилади. Ҳар бир фандан 30 тадан жами 60 та тест саволи берилади. Ҳар бир тўғри жавоб 3,1 балл билан баҳоланади. Максимал балл – 186 балл.

Блогер Хушнуд Худойбердиевнинг қўшимча қилишича, айрим йўналишларда мажбурий блокдаги фан билан махсус блокдаги фан бир хил бўлиб қолиши мумкин. Масалан, математика йўналишига ҳужжат топширган абитуриент мажбурий блокда ҳам, мутахассислик блокида ҳам математика фанидан тест ишлайди.

«Бу иккаласининг асосий фарқи —мажбурий блокдаги саволларнинг барчаси соддалаштирилган, энг осон даражада бўлади, мутахассислик блокидаги саволлар эса турли мураккабликда (осон, ўртача, қийин) бўлади», — деб ёзади у.

Қайд этиш жоиз, бешта фандан тест бўлишига оид тартиб фақат давлат ОТМларига тааллуқли — ушбу янги тартиб ҳарбий, диний, хусусий, нодавлат ва хорижий ОТМларга алоқадор эмас. Ўз навбатида, учта мажбурий фан касбий (ижодий) имтиҳон топшириладиган йўналишлар учун, шунингдек магистратура учун тааллуқли эмас. 3+2 кўринишдаги янги тартиб бакалавриатнинг барча таълим шакллари — кундузги, сиртқи, кечки — учун бирдек қўлланади.

Қайд этишларича, мажбурий блокда она тили (ўзбек, рус ёки қорақалпоқ тили) фанидан тушадиган 15 та савол ичида адабиёт фанидан, Ўзбекистон тарихи фанидан тушадиган 15 та савол ичида жаҳон тарихидан, математика фанидан тушадиган 15 та савол ичида эса геометрия ёки информатикадан тест саволлари бўлмайди. Ўз навбатида мутахассислик блокида математика фанидан тушадиган 30 та савол ичида информатикадан саволлар бўлмайди.

Тест саволлари тушадиган дарсликлар рўйхати билан бу ерда танишиш мумкин.