АҚШ Давлат департаменти Ўзбекистонни диний эркинликлар бузилиши туфайли хавотирга сабаб бўлаётган давлатлар рўйхатида қолдирди, дея хабар бермоқда «Kun.uz».
Давлат департаменти баёнотида айтилишича, диний эркинликни ҳимоя қилиш Трамп маъмурияти ташқи сиёсатининг устувор йўналишидир. Дин ёки эътиқод бўйича таъқиб ҳамда камситиш дунёнинг барча минтақаларида мавжуд экани айтилади.
«АҚШ диний эркинликни тарғиб қилиш ва бу борадаги ҳуқуқбузарликларга қарши курашиш устида ишлашни давом эттирмоқда. Сўнгги белгилар ушбу муҳим ишнинг давомидир», — дейилади Давлат департаменти баёнотида.
АҚШ Давлат департаменти 18 декабрь куни Бирма, Хитой, Эритрея, Эрон, Шимолий Корея, Покистон, Саудия Арабистони, Тожикистон ва Туркманистонни 1998 йилги «Диний эркинлик тўғрисида»ги қонунга биноан, «диний эркинлик бузилиши доимий равишда давом этаётган ва бу борада жуда жиддий ҳолатлар учраётган» вазиятларда қатнашганлик ёки унга йўл берганлик учун алоҳида ташвиш туғдираётган давлатлар сифатида қолдирди.
Давлат департаменти Комор ороллари, Россия ва Ўзбекистонни «диний қонунбузарликларнинг жиддий ҳолатлари»ни содир этган ёки содир этилишига йўл қўйган ҳукуматлар учун Махсус назорат рўйхатига (Special Watch List, SWL) киритган.
Бундан ташқари, ушбу рўйхатга Куба, Никарагуа, Нигерия ва Судан ҳам киритилган. Судан SWL’га ўтиш даври ҳукумати томонидан «диний эркинликларнинг мунтазам, доимий ва қўпол равишда бузилиши»ни бартараф этиш бўйича қўйилган муҳим қадамлар туфайли ўтказилган.
Шунингдек, «Ал-Қоида», «Аш-Шабоб», «Боко Ҳарам», Ямандаги ҳусийлар, ИШИД, «ИШИД-Хуросон» ва «Толибон» алоҳида ташвишга солаётган ташкилотлар сифатида кўрсатилган.
«Ушбу қарорлар АҚШнинг ўз диний ёки эътиқод эркинлигидан фойдаланмоқчи бўлганлар кишиларни ҳимоя қилиш мажбуриятини таъкидлайди. Фикримизча, ҳар бир инсон ҳар доим ва ҳамма жойда ўз эътиқодига мувофиқ яшаш ҳуқуқига эга бўлиши лозим. Биз ушбу асосий ҳуқуқларни бузишга ҳаракат қилаётган давлат ва нодавлат ташкилотларга чақириқ ташлашда давом этамиз, улар ўз ҳаракатлари учун жавобгарликка тортилишларини таъминлашга ҳаракат қиламиз», — дейилади Давлат департаменти баёнотида.
Изоҳ (0)