Қамчиқдан одамлар эвакуация қилинди. ФВВ жабрланганлар ва талофатлар йўқлигини маълум қилди

«Тошкент—Ўш» автойўлининг Қамчиқ довонидан ўтган 228—253-километрлари оралиғида қор кўчиши хавфи эълон қилинган. Шу боис, ФВВдан хабар беришларича, соат 8:00 дан бошлаб Тошкент вилоятининг «Чинор» ва Наманган вилоятининг «Шеробод» постлари оралиғида автотранспорт ҳаракатланиши вақтинчалик тўхтатилган.

Фавқулодда вазиятларда уларнинг олдини олиш ва ҳаракат қилиш давлат тизими (ФВДТ) ҳамда Фавқулодда вазиятлар вазирлигидан 45 та техника, 200 га яқин шахсий таркиб одамларни довондан эвакуация қилишга жалб этилган. Улар 15 та назорат кузатув постларига (рўйхат), «Қамчиқ» отрядига, қолаверса, Тошкент вилоятининг Оҳангарон ва Ангрен шаҳарлари ҳамда Наманган вилоятининг Поп туманидаги умумовқатланиш шохобчаларига етказилган.

«Қамчиқавтойўл» корхонаси йўлларни қордан тозалаш ишларига 115 та махсус муҳандислик техникаси ва 314 нафар мутахассисни жалб этган. ФВВдан маълум қилишларича, ушбу вазият оқибатида жабрланганлар йўқ ва талафотлар аниқланмаган.

Аввалроқ «Ўзбекистон темир йўллари» Ангрен темирйўли орқали қўшимча йўловчи поезди қўйилгани, «Оҳангарон», «Ангрен» ва «Орзу» станцияларидан аҳолини эвакуация қилиш ишлари ташкиллаштирилгани ҳақида хабар берган эди.

«Ҳурматли фуқаролар! ‘Қамчиқ’ довонида об-ҳаво барқарор бўлмагунига қадар довон орқали вақтинчалик ҳаракатланмасликни тавсия этамиз», — дейилади ФВВ маълумотида.